Talaado, January 28, 2025 (HOL) - Ciidamada dowladda Fedaraalka Soomaaliya oo garab ka helaya kuwa dadka deegaanka ayaa si buuxdo ula wareegay deegaano dhowr ah oo hoostaga degmada Buula burte, kadib dagaalo culus oo ay halkaasi kula galeen saacadahii lasoo dhaafay kooxda Al-shabaab.
Ciidamada iskaashanaya ayaa la wareegay deegaanada kala ah Beero Yabaal, Bur Abooto, Eega Galmay, Jidcillaan iyo Caddow Gurey oo dhamaantood ah deegaano hoostaga Buula burte, halkaas oo maalmahii lasoo dhaafay isku aruursanayeen kooxda Al-shabaab.
Kooxda Al-shabaab ayaa la tilmaamay in jab xoogan lagu gaarsiiyay dagaalka saacadahii lasoo dhaafay ka dhacay inta u dhaxeysa Halgan iyo Buula burte.
Sarkaal ka tirsan ciidanka Macawiisleeyda oo la hadlay HOL ayaa sheegay in Al-shabaab ay bilaawday iney isku soo ekeeysiiyaan ciidanka Macawiisleeyda oo ay soo xirteen Macawiisyo.
"Khawarijta Shabaab cashar aysan ilabi doonin ayaan ugu dhignay Beera yabaal iyo tuuloyin kale oo badan halkaas oo aan si awood ah uga saarnay, Khawarijta waxay danta ku qasabtay iney isku soo keen akeysiiyaan oo Macwiisyo ay soo xirtaan ayna dhahaan waxanu nahay Macawiisley, meydadkooda waa daadsan yahay 15 ka badan waan arkay hub badana waan ka furanay" ayuu yiri Sarkaalka HOL la hadlay oo lagu magacaabo Axmed Cali.
Si kastaba ha ahaate howlgaladaan saacadahii lasoo dhaafay ka dhacay deegaanada ka tirsan gobolka Hiiraan ayaa qeyb ka ah howlgalada dowladda ku dooneyso in dalka looga xureyo kooxda Al-shabaab.