Khamiis, January 30, 2025 (HOL) - Warar dheeraad ah ayaa kasoo baxaya diyaarad rakaab ah oo ay saarnayeen dad gaaraya 60 ruux iyo diyaarad Helikabtar ah oo isku dhacay Xalay fiidkii hore ee xiliga Washington.
Diyaarada rakaabka siday iyo Helikabtarka oo aheyd diyaarad Militari ayaa labadoodaba laga leeyahay dalka Mareykanka, sida ay sheegtay waaxda maamulka hawada fedraalka ee FAA.
Labada diyaaradood ayaa lasoo wariyay iney isku dhaceen, iyagoo maraayay bartamaha hawada meel u dhaw magaalada Washington ee dalkaasi Mareykanka.
Diyaarada rakaabka ah waxaa saarna 60 qof iyo sadax ruux oo Shaqaalaha diyaaradda ah, halka diyaarada helikabtarka ahna ay saaranayeen sadax askari oo ka tirsan ciidamada Mareykanka.
Labada diyaarad ayaa ku dhacay wabiga Potomac ee isku xira Washington iyo waqooyiga gobolka Virginia. Waxaa socda howlgal ballaaran oo ay wadaan laamaha kala duwan ee ciidamada amniga iyo shaqaalaha u carbisan howlaha gurmadka.
Dowladda Mareykanka ay joojisay dhamaan duulimaadyada iyo soo degista diyaaradaha ee garoonka weyn ee Ronald Reagan, waxaana la filayaa in saraakiisha gargaarka ay la hadlaan goordhaw Warbaahinta.