Khamiis, December 4, 2025 (HOL) - Maxkamad ku taalla Nairobi ayaa bandhigtay muuqaal kaamirada CCTV ah oo lagu arkayo dhaqdhaqaaqii Hashim Dagane Muhumed, oo sidoo kale loo yaqaan Hashim Mohamed Khalif, kaas oo lagu eedeeyay inuu sanadkii hore dilay afar haween ah oo lagu dilay meelo kala duwan.
Hashim ayaa gabi ahaanba beeniyay eedeymaha, isaga oo ku adkaystay inuusan waxba galabsan, kana soo horjeestay afar dacwadood oo dil ah, kuwaas oo ka soo horjeeda Qodobbada 203 iyo 204 ee Xeerka Ciqaabta.
Eedeysanaha ayaa lagu eedeeyay inuu Dahabo Daud Said (Waris) ku dilay habeenkii u dhexeeyay 21–22 Oktoobar 2024 deegaanka Kyumbi ee County-ga Machakos.
Isla habeenkaas ayuu sidoo kale lagu eedeeyay inuu ku dilay Amina Abdi Rashid Dhahir iyo Musayba Abdi Mohammed xaafadda Parklands ee Nairobi.
Haweeneyda afaraad oo ahayd saaxiibtiisa, Deka Abdi Noor Gorane, ayaa la sheegay in lagu dilay habeenkii u dhexeeyay 29–30 Oktoobar 2024 gudaha Valley Heights Apartments ee Lavington, Nairobi.
Intii ay socotay dhageysiga hortiisa Garsoore Margaret Muigai, K/C Lawrence Kamau, oo ah khabiir CCTV, ayaa soo bandhigay muuqaallo muujinaya sida ay wax u dhaceen. Wuxuu sheegay in 7:48 fiidnimo 21-kii Oktoobar 2024 ay kaamiradu qabatay haweeney dhar madow ku labisan oo raacaysa wiish ku yaal Eastleigh Section 4. Daqiiqado kadib, waxaa lagu arkay iyadoo ka soo baxaysa wiishka oo raaceysa gaari yaalay meel u dhow dhismaha.
Habeenkaas dambe, isla gaarigaas ayaa lagu arkay Total Energies Athi River, halkaas oo uu shidaal ka qaatay 11:49pm ilaa 11:51pm. Gaarigu wuxuu dib ugu soo noqday dhismaha Eastleigh wax yar kadib saqdii dhexe, waxaana muuqaalka laga arkayay laba haween ah oo ka baxaya dhismaha, isla markaana gaadhiga raacaya 1:03am.
Dhageysiga dacwadda ayaa sii socon doona waxaana baarayaashu soo bandhigayaan caddeymo kale oo lagu xiriirinayo Hashim iyo dilalka loo haysto.