Arbaco, January 29, 2025 (HOL) - Wasiirka Wasaaradda Arrimaha Dibadda ee Xukuumadda Fedaraalka Soomaaliya Axmed Macalin Fiqi ayaa maanta magaalada Daarusalaam ee dalka Tanzania sadax heshiis kula saxiixday qaar ka mid ah Wasiiradadda dalkaas.
Wasiir Axmed Macalin Fiqi ayaa heshiisyada la saxiixday Wasiirada kala ah Warfaafinta, Hiddaha, Dhaqanka iyo Cayaaraha ee dalka Tanzania, Hon. Prof. Palamagamba John Aidan Mwaluko, iyo Wasiirka Arrimaha Gudaha dalkaasi, Hon. Innocent Lugha Bashungwa.
Munaasabada heshiisyadaan lagu saxiixayay waxaa goobjoog ka ahaa Wasiirka Biyaha iyo Tamarta Soomaaliya Cabdullaahi Bidhaan, Safiirka Soomaaliya u fadhiya dalka Tanzania Danjire Ilyaas Cali Xasan iyo Agaasime ku xigeenka madaxtooyada Soomaaliya Maxamed Amiin Cismaan.
"Heshiisyada saxiixa lagu duugay ayaa kala ahaa iskaashiga bedqabka iyo nabad-gelyada, is-dhaafsiga maxaabiista xukuman iyo Is-afgarad ku saabsan iskaashiga dhinaca horumarinta afafka Sawaaxiliga iyo dhaqanka" ayaa lagu yiri qoraal kasoo baxay Wasaaradda arrimaha Dibadda Soomaaliya.
Heshiisyadaan ay kala saxiixdeen dowladaha Soomaaliya iyo Tanzania ayaa ah kuwa kor loogu qaadayo xiriirka laba geesoodka ah ee ka dhaxeeya labada dal.
Heshiiska is dhaafsiga maxaabiista ayaa kusoo aadaya, iyadoo muwaadiniin Soomaaliyeed ay ku xiran yihiin xabsiyada ku yaala dalkaasi Tanzania, waxaana la filaya in Soomaaliya ay si deg deg ah ula soo waaregto oo ay dalka dib ugu soo celiso muwaadiniinta ku xiran dalka Tanzania.
Ugu dambeyntii 19-kii bishii December ee sanadkii 2024 ayay aheyd marki magaalada Muqdisho Wasiirro kala matalayey labada dal ay kala saxiixdeen afar heshiis oo muhiim ah oo isugu jirey, iskaashiga siyaasadeed ee labada dal ee dhanka Gaashaandhigga, Caafimaadka iyo Dalxiiska.