Talaado, November, 26, 2024 (HOL) - Wararka ka imaanaya magaalada Diridhabe ayaa sheegaya in Aadan Alaale oo kamid ah Siyaasiyiinta u dhashay Dowlad Degaanka Soomaalida lagu xidhay magaalada Diridhabe.
Lama ogaanin wali sababta loo xidhay Aadan Alaale balse wararka qaar ee ka imaanaya magaalada Diridhabe ayaa sheegaya in Aadan Alaale loo xidhay hadalo uu hadda ka hor ka jeediyay Warbaahinta, kuwaas oo uu ku dhaliilayay maamulka ka arrimiya magaalada Diridhabe.
Sidoo kale waxaa la sheegay in loo haysto Aadan Alaale inuu kicinayo Soomaalida deggan magaalada Diridhabe, isagoo sheegay in Soomaalida ku nool Diridhabe ay dhibaatooyin badan kala kulmaan madaxda ka arrimiya magaalada Diridhabe, isla markaana aysan helin xuquuqdoodii ay ku lahaayeen maamulka magaalada Diridhabe.
Xadhiga lagula kacay Siyaasi Aadan Alaale ayaa waxaa ka horyimid Shacabka Soomaalida ee ku dhaqan magaalada Diridhabe, sidoo kale waxaa xadhigaas cambaareeyay qaar kamid ah Odayaal dhaqameedka iyo waxgaradka Dowlad Degaanka Soomaalida.
Aadan Alaale ayaa ah Siyaasi u dhashay Dowlad Degaanka Soomaalida isagoo deegaan ahaana ka soojeeda magaalada Diridhabe, waxaa uu inta badan caan ku yahay inuu ka hadlo Xaaladda magaalada Diridhabe gaar ahaan Soomaalida deggan Diridhabe oo inta badan uu udoodo xuquuqdooda ay ku leeyihiin maamulka magaalada Diridhabe, waxa kale oo uu caan ku yahay hadallada cadcad ee uusan kala gaban maamulka degaanka Soomaalida iyo kan Diridhabe.
Dowlad Degaanka Soomaalida iyo Maamulka magaalada Diridhabe midna wali kama hadlin xadhigga Siyaasi Aadan Alaale oo shalay galinkii dambe lagu xidhay Ismaamulka magaalada Diridhabe.