Arbaco, January 7, 2026 (HOL) - Xoghaynta Guud ee Ururka Iskaashiga Islaamka (OIC) ayaa shaacisay in shir degdeg ah la isugu yeerayo Golaha Wasiirrada Arrimaha Dibadda, kaas oo qabsoomi doona Sabtida 10-ka Janaayo 2026, laguna qaban doono xarunta ururka ee magaalada Jeddah.
Shirkan ayaa diiradda lagu saari doonaa xaaladda cakiran ee ka taagan Jamhuuriyadda Federaalka Soomaaliya, gaar ahaan kaddib tallaabo muran badan dhalisay oo ay Israel ku dhawaaqday inay ku aqoonsanayso Somaliland inay tahay dowlad madax-bannaan, arrintaas oo si weyn uga careysiisay dowladda Soomaaliya iyo dalal badan oo caalamka ah.
Ururka Iskaashiga Islaamka ayaa sheegay in shirkan looga gol leeyahay in la mideeyo mowqifka dalalka Islaamka, lana muujiyo taageero cad oo buuxda oo loo hayo midnimada, madaxbannaanida iyo dhul ahaan wadajirka Jamhuuriyadda Federaalka Soomaaliya, iyadoo la raacayo shuruucda caalamiga ah iyo go’aannadii hore ee ururka.
Xiisadda ayaa sii xoogeysatay kaddib markii Wasiirka Arrimaha Dibadda Israel, Gideon Sa’ar, uu booqasho ku tegay magaalada Hargeysa, halkaas oo uu kula kulmay madaxda Somaliland. Dowladda Soomaaliya ayaa booqashadaas ku tilmaantay mid sharci-darro ah, kuna sheegtay “faragelin aan fasax loo haysan” oo lagu sameeyay dhulka Soomaaliya.
Wasaaradda Arrimaha Dibadda Israel ayaa dhankeeda sheegtay in wasiirku uu la kulmay madaxweynaha Somaliland Cabdiraxmaan Maxamed Cabdullaahi (Cirro), isla markaana Israel ay ballan-qaadday gargaar dhinacyada biyaha, caafimaadka iyo waxbarashada, iyo sidoo kale iskaashi dhanka difaaca ah.
Dowladda Federaalka Soomaaliya ayaa si adag u cambaareysay booqashadaas, iyadoo sheegtay in wax xiriir ama booqasho rasmi ah oo lala yeesho Somaliland aanay sharci ahayn haddii aan oggolaansho laga haysan dowladda federaalka.
Sidoo kale, Jaamacadda Carabta ayaa ku dhawaaqday inay si cad uga soo horjeeddo wax xiriir rasmi ah ama mid aan rasmi ahayn oo lala yeesho Somaliland, kana baxsan midnimada iyo madax-bannaanida Soomaaliya, iyagoo ka digay in arrintan ay khatar ku tahay amniga iyo xasilloonida gobolka, gaar ahaan Badda Cas, Gacanka Cadmeed iyo Geeska Afrika.
Indhaha siyaasadda Soomaaliya iyo tan caalamkaba ayaa hadda ku sii jeeda natiijada ka soo bixi doonta shirka degdegga ah ee Ururka Iskaashiga Islaamka, kaas oo la filayo in uu cadeeyo mowqif midaysan oo taageeraya Soomaaliya iyo midnimadeeda.