Jimco, November, 1, 2024 (HOL) - Afhayeenka Millateriga Somaliland Cabdi Cadillaahi Cabdi Dheere, ayaa sheegay in ciidanka Somaliland iyo kuwa SSB ay guulo ka gaadheen dagaalkii shalay iyo maanta aaga Shangeed ay kula galeen ciidamada SSC Khaatumo.
"Ciidanka madaniga ah iyo ciidanka qaranka Somaliland iyaga oo is garabsanaya cadawgana waynu iska difaacanaynaa doorashaduna way dhacaysa, ciidanka qaranka iyo ciidamada madaniga ahi waxay diyaar u yihiin in ay dalkooda iyo dadkoodaba difaacaan" ayuu yidhi Cabdi Dheere.
Waxa uu sheegay in jab kasoo gaadhay ciidamada SSC Khaatumo dagaalka maanta dhacay, isaga oo sheegay in u jeedadan colaadan cusubi ay tahay in la carqaladeeyo doorashooyinka dhawaan qorshaysan.
Dhinaca kale wasaarada arrimaha guddaha ayaa sheegtay in ciidamada Somaliland iyo kuwa SSB ay dileen hoggaamiye ku xigeenkii ciidamada Cabdi Madoobe ee aaga Buuhoodle, taasi oo ay sheegtay in ay muujinayso guusha ay ka gaadheen dagaalka.
Dhinaca kale, Wasiirka Warfaafinta SSC Khaatumo, ayaa dagaalka ku eedeeyay Somaliland, isaga oo sheegay in ciidankiisu ay guulo kasoo hooyeen deegaanada dagaalku ka socdo, wuxuuna sheegay in ay qabsadeen maxaabiis iyo gaadiid.
Ciidamada SSB ayaa dhankooda soo bandhigay maxaabiis iyo laba baabuur oo ay ku kala qabsadeen dagaalkii shalay iyo maanta, wali si rasmi ah looma oga khasaaraha guud ee dagaalka.