2/28/2024
Today from Hiiraan Online:  _
Wararka Maanta- Talaado, Feb 6 , 2024
Ra’iisul Wasaaraha Itoobiya oo sheegay in dowladda Itoobiya aysan dooneyn in ay dagaal la gasho Soomaaliya
 

Talaado, February, 6, 2024 (HOL) - Ra’iisul Wasaaraha Itoobiya Abiyi Axmed oo maanta hortagay Golaha Wakiilada Shacabka ee Itoobiya ayaa jawaabo ka bixiyay su'aalo ay wakiilada shacabku ka waydiiyeen heshiiskii is afgarad ee dhinaca Badda ahaa ee bil ka hor Itoobiya la gashay Somaliland.

Abiyi Axmed waxa uu sheegay in Dowladda Itoobiya aysan marna rabin inay dagaal lagasho Soomaaliya, Waxa uu xusay in dalal "uusan magacaabin" ay rabaan inay colaad iyo dagaal ka dhex abuuraan Dowladaha Itoobiya iyo Soomaaliya, kuwaas oo uu ku sheegay inay adeegsanayaan gacanta Soomaaliya,  waa siduu hadalka u dhigay Abiyi Axmed.

Abiyi Axmed waxa kale oo uu sheegay in Itoobiya aanay marnaba rabin inay Soomaaliya dhibaato u geysato, isla markaana ay kumannaan Itoobiyaan ahi u dhinteen sidii ay nabad u heli lahaayeen shacabka Soomaaliya, isagoo ula jeeda Ciidamada Itoobiya ee qaybta ka ah Midowga Afrika kuwaas oo ku sugan Soomaaliya.

Dhinaca kale Abiyi Axmed waxa uu xusay in Dowladdiisu ilaalinayso midnimada Soomaaliya, oo aysan marna ku dhaqaaqayn wax lid ku ah Soomaaliya, waxa uu sheegay in inbadan ka Itoobiya ahaan isku dayeen heshiisiinta Soomaaliya iyo Somaliland, "berri ka maalin markay heshiiyaan Soomaaliya iyo Somaliland ay Itoobiya tahay dalka u horreeya ee ku farxa arrintaas una hambalyeeya", waa siduu hadalka u dhigay Abiyi Axmed.

Abiyi Axmed ayaa sheegay in Dadka Soomaaliyeed marka laga soo tago Soomaaliya dalka ku xiga ee ay degaan uu yahay Itoobiya "Soomaliya waa meesha Soomaalida ugu badan ay degaan, Waxaa soo raaca waa Itoobiya, Kenya iyo Jibuuti". ayuu yiri Abyi Axmed.

Si kastaba ha ahaatee, Ra'iisal wasaare Abiyi Axmed marna kama hadlin mana soo hadal qaadin Somaliland iyo waxa ay dowladdiisu ka yeelayso Aqoonsiga Somaliland ee qaybta ka ahaa heshiiskii is afgarad ee bil kahor dhexmaray iyaga iyo Somaliland.

Haddalladan maanta ee Abiyi Axmed ka horjeediyay Golaha Wakiilada Shacabka ee dalka Itoobiya ayaa kusoo aadaya xilli wali halkeedii taagan tahay xiisada Itoobiya iyo Soomaaliya, taas oo ka dhalaytay kaddib markii horraantii bishii hore ay Itoobiya iyo Somaliland heshiis is afgarad oo dhinaca Badda ah ku kala ka saxiixdeen Addis Ababa, heshiiskaas oo ay si buuxda uga hortimid Dowladda Soomaaliya iyo dalal badan oo caalamka kamid ah.












Click here
2/6/2024 10:20 AM EST
Talaado, February, 6, 2024 (HOL) - Waxaa goordhaw garoonka diyaaradaha Aadan Cadde ee magaalada Muqdisho laga soo dajiyay eedeysane Sayid Cali Macalin Daa'uud oo ah nin ku eedeysan inuu dhawaan Muqdisho ku gubay Xaaskiisii oo Xaamilo aheyd.

2/6/2024 9:33 AM EST
Talaado, February, 6, 2024 (HOL) - Guddoomiye ku xigeenka amniga iyo siyaasada maamulka gobolka Banaadir Maxamed Axmed Diiriye Yabooh oo warbaahinta kula hadlay gudaha Suuqa Bakaraaha ayaa faahfaahin dheeraad ah ka bixiyay weerar khasaare geystay oo maanta ka dhacay Bakaaraha.

2/6/2024 6:47 AM EST
Talaado, February, 6, 2024 (HOL) - Dhowr hoobiye ayaa goor dhowayd ku dhacay suuqa bakaaraha ee magaalada Muqdisho, iyadoo ay ka dhasheen khasaare dhaawacyo ah.

2/6/2024 3:59 AM EST
Talaado, February, 6, 2024 (HOL) - Maxkamadda Degmada Hargeysa ayaa saaka sannad iyo lix bilood oo xadhig ah ku xukuntay abwaan Cabdiraxmaan Aadan Ibraahin (Abees), oo shalay Hargeysa lagu xidhay sida uu walaalkii u xaqiijiyay Galaydh Media.

2/6/2024 2:58 AM EST
Talaado, February, 6, 2024 (HOL) - Guddoomiyaha Xisbiga Waddani ee Somaliland Xirsi Cali Xaaji Xasan, ayaa beeniyay warar sheegayay in dowlada Ingiriisku ay wax ka waydiisay baasboorkiisa, isla markaana lagu xidhay London.

2/6/2024 2:08 AM EST
Talaado, February, 6, 2024 (HOL) - Aabaha dhalay gabadhii dhawaan ninkeeda uu ku gubay gudaha magaalada Muqdisho Sheekh Cabdicasiis Maxamed oo ka hadlay soo qabashada ninkii dilay gabadhiisii Luul Sheekh Cabdicasiis ayaa ugu horeyn u mahadceliyay madaxda dowladda Fedaraalka.

2/6/2024 1:44 AM EST
Talaado, February, 6, 2024 (HOL) - Madaxweynaha dowladda Fedaraalka Soomaaliya Xasan Sheekh Maxamuud ayaa markale fariin adag u diray dowladda Itoobiya oo ku aadan damaceeda ku aadan iney hesho qeyb ka mid ah biyaha iyo dhulka Soomaaliya.

2/6/2024 1:05 AM EST
Talaado, February, 6, 2024 (HOL) - Cutubyo ka tirsan ciidamada badda Hindiya ayaa la geynayaa biyaha istaraatiijiga ah ee Jabuuti, Gacanka Cadmeed, Xeebta Bari ee Soomaaliya iyo sidoo kale Waqooyiga iyo Badda Carabta.