Talaado, December 24, 2024 (HOL) - Talisyada Sirdoon ee Itoobiya iyo Soomaaliya ayaa kulan gaar ah ku yeeshay magaalada Addis Ababa ayaa waxa ay kawada hadleen qodobadii kasoo baxay Shirkii magaalada Ankara ka dhacay oo ay labada Dowladood ay heshiisyo dhowr qodob ah kusaxiixeen waxayna isla garteen inay xoojiyaan sidii looga hortagi lahaa saameynta ay ku yeelan karaan dadka caqabada ku ah dhaqangelinta heshiiskii Ankara.
Warbaahinta Itoobiya ayaa sheegtay in Agaasimaha Guud ee Warfaafinta iyo Nabadsugida Itoobiya Danjire Redwaan Xuseen iyo Madaxda Istiraatiijiyada ee Hay’adda ay arimahaasin kala hadleen Agaasimaha Hay’adda Sirdoonka iyo Nabadsugida Qaranka Soomaaliya Cabdullaahi Maxamed Cali Sanbaloolshe.
Labada Hay’adood ee sirdoonka Soomaaliya iyo Itoobiya waxa ay madaxdoodi sheegeen inay ku heshiiyeen inay buuxiyaan kaalintooda kaga aadan sidii ay uga difaaci lahaayeen cid waliba oo caqabad ku ah dhaqangelinta heshiiska Ankara, gaar ahaan dhanka xog is dhaafsiga.
Laamaha sirdoon ee Soomaliya iyo Itoobiya ayaa shaaca ka qaaday in Al-shabaab ay weli tahay khatarta wali ka jirta Bariga Afrika,. Waxa ay ku heshiiyeen in ay la dagaalamaan argagixisada iyaga oo wax ka baranaya dhaqamadooda iyo xoojinta sidii ay Dowladda Soomaaliya gacanta ugu sii hayn lahayd goobaha cusub ee laga xoreeyay argagixisada.
Itoobiya waxa ay qeyb ka tahay Howlgalka Nabad ilaalinta ee ATMIS, waxaana soo baxaya warar kale oo tibaaxaya in Ciidamadoodi ay ka qeyb qaateen dagaal ka dhacay Degmada Doolow, Itoobiya waxa ay shaaca ka qaaday inay baaritaan sameeyn doonaan.