12/21/2024
Today from Hiiraan Online:  _
Wararka Maanta- Khamiis, Dec 19, 2024
Agaasimayaasha Sirdoonka Soomaaliya iyo Tanzania oo maanta heshiis is afgarad ku gaaray Muqdisho
 

Khamiis, December 19, 2024 (HOL) - Agaasimaha hay'adda Nabad sugidda iyo Sirdoonka Qaranka Soomaaliyeed ee NISA Cabdullaahi Maxamed Cali Sanbaloolshe ayaa maanta Muqdisho ku qaabilay dhiggiisa Agaasimaha Sirdoonka dalka Tanzania ee TISS Suleiman Abubakar Mombo oo booqasho labo maalin ah ku jooga Muqdisho.

Agaasimayaasha labada dal ayaa kulankooda uga wada hadlay iskaashiga Sirdoonka iyo is dhaafsiga xogaha iyo ka hortaga khataraha waxa loogu yeero argagixisada.

Labada Agaasime ee Sirdoonada Soomaaliya iyo Tanzania ayaa kala saxiixdeen heshiis is afgarad oo ay ku adkeeynayaan muhiimadda iskaashigan oo lagu dar dargelinayo doorka labada hay’ad ee dagaalka ka dhanka ah halista kooxaha loogu yeero argagixisada.

Ugu dambeyntii Agaasime Cabdulaahi Maxamed Cali Sanbaloolshe ayaa tan iyo markii uu xilkaan qabtay waday dadaalo uu dib ugu soo celinayo xiriirada hay’adda la laheyd hay’addaha Sirdoonka dalalka Saaxibada dhow la ah Soomaaliya.

Hoos ka akhriso Warsaxafadeed faahfaahsan oo kasoo baxay hay'adda NISA:-