Dowladaha Soomaaliya iyo Tanzania oo heshiis dhowr ah ku saxiixday Magaalada Muqdisho
Khamiis, December 19, 2024 (HOL) - Waxaa maanta Magaalada Muqdisho heshiisyo caalami ah kuwada saxiixday Dowladaha Soomaaliya iyo Tanzania waxaana ay ka koobnaayeen ilaa 5 heshiis oo labada dalba muhiim u ah waxaana kamid ah arrimaha dibadda, caafimaadka, dalxiiska, difaaca, iyo waxbarashada, kuwaas oo muujinaya sida labada dal ugu heellan yihiin horumarinta iskaashiga gobolka iyo horumarinta waara.
Munaasabadda waxaa guddoomiyey Ra’iisul Wasaare Ku-xigeenka Soomaaliya, Saalax Axmed Jaamac, taas oo xoojisay doorka sii kordhaya ee Soomaaliya ee dhinaca diblomaasiyadda iyo sida Tanzania ugu heellan tahay horumar wadajir ah.
Ra'iisul wasaare kuxigeenka dalka Saalax Axmed Jaamac, ayaa ammaanay heshiisyadan isagoo sheegay inay muujinayaan himilooyinka wadaagga ah ee labada dal waxaana uu yiri “Heshiisyadani waa caddeyn u ah xiriirka adag ee ka dhexeeya Soomaaliya iyo Tanzania. Waxay dhidib u taagayaan horumarka dhaqaalaha, xasilloonida gobolka, iyo barwaaqada dadka labadeenna dal.”
Wasiirka Arrimaha Dibadda, Axmed Macallin Fiqi, oo khudbad kooban uu madashaan ka jeediyay ku yiri "Saxiixa heshiisyadan wuxuu muujinayaa sida Soomaaliya ugu heellan tahay iskaashiga goboleed. Iskaashigan wuxuu faa’iidooyin muuqda u keeni doonaa labada dal wuxuuna dhiirrigelin doonaa xiriirro xooggan oo guud ahaan Geeska Afrika ah.”
“Maanta waxay calaamad u tahay guul muhiim ah oo xiriirka Soomaaliya iyo Tanzania. Heshiisyadani waxay furi doonaan albaabbo iskaashi oo wax ku ool ah iyo horumar wadajir ah oo ku saabsan waaxyaha muhiimka ah.” ayuu yiri Wasiirka Arrimaha Dibadda Tanzania Maxamuud Thabit Kombo.
Hoos ka Akhriso Heshiisyada Muhiimka ah ee la kala Saxiixday:-
1. Iskaashiga Guud ee Arrimaha Dibadda
Heshiiska ay wada galeen Wasiirka Arrimaha Dibadda, Axmed Macallin Fiqi, iyo Wasiirka Arrimaha Dibadda Tanzania, Maxamuud Thabit Kombo, wuxuu dhisayaa qaab iskaashi oo sare u qaadaya xiriirka diblomaasiyadeed. Heshiiskan waxaa ka mid ah iskaashiga dhinaca xasilloonida gobolka, is-weydaarsiga aqoonta, iyo isku-dubbaridka dadaallada caalamiga ah si kor loogu qaado nabadda iyo horumarka.
2. Iskaashiga Dhanka Caafimaadka
Wasiirka Caafimaadka Soomaaliya, Dr. Cali Xaaji Aadan Abubakar, iyo Wasiirka Caafimaadka ee Tanzania, Godwin Oloyce Mollel, waxay saxiixeen heshiis diiradda saaraya horumarinta nidaamka caafimaadka ee labada dal. Heshiisku wuxuu xooga saarayaa xallinta cudurrada faafa, taageeridda caafimaadka guud, iyo xoojinta adeegyada caafimaadka ee dadka aan helin adeegyada ku filan.
3. Horumarinta Dalxiiska
Wasiirka Warfaafinta, Dhaqanka, iyo Dalxiiska ee Soomaaliya, Da’ud Aways Jaamac, iyo Wasiirka Dalxiiska iyo Khayraadka Dabiiciga ah ee Tanzania, Dr. Pindi Hazara Chana, waxay kala saxiixdeen heshiis lagu horumarinayo dalxiiska. Heshiiskan wuxuu dhiirrigelin doonaa is-dhaafsiga dhaqanka, ololayaasha suuqgeynta dalxiiska, iyo maalgashiga lagu soo bandhigayo hidaha gaarka ah ee labada dal.
4. Iskaashiga Difaaca iyo Amniga
Wasiirka Difaaca Soomaaliya, Cabdulkadir Maxamed Nuur, iyo dhiggiisa Tanzania waxay si rasmi ah u saxiixeen heshiis ku saabsan xoojinta iskaashiga difaaca. Heshiiskan wuxuu xoogga saarayaa dhisidda awoodaha, barnaamijyada tababarka wadajirka ah, iyo dadaallada iskaashiga lagu horumarinayo amniga iyo xasilloonida gobolka.
5. Iskaashiga Waxbarashada
Soomaaliya iyo Tanzania waxay sidoo kale kala saxiixdeen heshiis ku saabsan iskaashiga waxbarashada, kaas oo diiradda saaraya is-dhaafsiga aqoonta tacliinta, deeqaha waxbarasho, iyo barnaamijyada iskaashiga lagu xoojinayo nidaamyada waxbarashada ee labada dal. Heshiiskan wuxuu ujeedkiisu yahay in dhallinyarada lagu dhiirrigeliyo wadaagista aqoonta iyo horumarinta awoodaha, taas oo taageereysa horumar waara ee labada waddan.
