Khamiis, October, 20, 2022 (HOL) - Qaar ka mid ah dadkii ku dhaawacmay qaraxyadii Shalay galinkii dambe ka dhacay magaalooyinka Buulaburte iyo Jalalaqsi ee gobolka Hiiraan ayaa la geeyay magaalada Muqdisho, waxaana qaraxyadaasi ku dhintay masuuliyiin iyo dad shacab ah.
Dhaawacyada la geeyay magaalada Muqdisho ayaa la sheegay iney ahayeen 17 ruux oo ahaa dadka dhaawacyada daran ay kasoo gaareen qaraxyada ka kala dhacay buundada Buulaburte iyo Degmada Jalalaqsi.
Agaasimaha hay’adda maareynta masiibooyinka Qaranka Cabdirashiid Maxamuud Xasan ayaa dhaawacyada uga hortagay garoonka Aadan Cadde, isagoona sheegay in dadkaan ay ahaayeen kuwo qabay dhaawacyada daran , islamarkaana xaaladooda caafimaad lagula tacaali doono isbitaalada ku yaala Magaalada Muqdisho.
Wuxuu intaasi ku daray Agaasimaha hay’adda maareynta masiibooyinka Qaranka in dadka xaaladooda caafimaad dalka wax looga qaban waayo in loo qaadi doono dalka dibaddiisa, taasina ay masuuliyad ka saaran tahay dowladda federaalka ah ee Soomaaliya.
Qaraxyadii Shalay ka dhacay magaalooyinka Jalalaqsi iyo Buulaburte ayaa lasoo warinaya iney ku dhinteen dad gaaraya 15 ruux oo isugu jiray masuuliyii iyo dad shacab ah, islamarkaana ay ku dhaawacmeen ku dhawaad 30 ruux.