Axad, November, 28, 2021 (HOL) - Warbaahinta dowlada Itoobiya ee Ethiopian Broadcasting Corporation, ayaa baahisay in madaxweynaha Somaliland Muuse Biixi Cabdi, taageeray dagaalka ay dowlada dhexe ee Itoobiya kula jirto TPLF.
Warbaahintan oo ka sheekaysay waxyaabihii ay ka wada hadleen madaxweyne Biixi iyo madaxweynaha Dowlad Deegaanka Somaalida, oo ay ugu mudnaayeen ganacsiga iyo amniga, ayaa dhinaca kale sheegtay in warar ay ka heleen dowlada deegaanku ay u sheegeen in Biixi taageeray howlgalka Abiye wado.
"Madaxweynaha Somaliland, Muuse Biixi Cabdi, ayaa sidoo kale sheegay inuu taageersan yahay howlgalka sharci fulinta ah ee ay dowladda Itoobiya ka waddo woqooyiga dalkaas, sida ay sheegayaan xogo aanu ka helnay xafiiska isgaadhsiinta dawlad deegaanka Soomaalida Itoobiya" ayaa lagu yidhi warbixinta.
Xukuumada Somaliland iyo ta dowlada deegaanka midna si rasmi ah loogama maqal in wax ku saabsan dagaalka Itoobiya labada madaxweyne ka wada hadleen, isla markaana Somaliland ayaa iyadu sannadihii u danbeeyay ka gaabsatay dhamaanba dhaq dhaqaaqyada ay wadeen madaxda geeska oo uu Abiye ugu horeeyo.
Abdilahi Geel-maal, Hiiraan Online
[email protected]