6/19/2024
Today from Hiiraan Online:  _
Wararka Maanta- Isniin, May 4 , 2020
Xog ku saabsan shilka diyaaradeed ee ka dhacay Bardaale

Isniin, 4 May, 2020 (HOL) :- Garoonka diyaaradaha Magaalada Bardaale ee gobolka Baay ee dowlad goboleedka Koonfur Galbeed waxaa maanta ka dhacay shil diyaaradeed sababay dhimashada lix qof oo saarnaa diyaaradda African Airways oo sida la sheegay halkaasi gaarsiisay agab caafimaad oo loogu talogalay shacabka ku dhaqan degmadaasi.

Hadaba waxa ay warar is khilaafsan kasoo baxeen sababta shilka ku yimid diyaaradda.

Hiiraan Online ayaa la xiriirtay madax ka tirsan dowlad goboleedka Koonfur Galbeed si aan u helno xog sugan oo ku saabsan shilkaasi.

Mid kamid ah saraakiisha sar-sare ee Koonfur Galbeed oo codsaday in aynan magaciisa xigan sababo la xiriira in uusan u idmanayn in uu warbaahinta xog la wadaago ayaa sheegay in shilku ahaa gantaal lala beegsaday diyaaradda.

"'Inkastoo ay baaritaannadu socdaan oo ayadoo faahfaahsan warbaahinta kala wadaagi doono haddana xogta aan heleeyno 90% waa in ciidamada Itoobiya ee ku sugan garoonka in ay gantaal ku dhufteen diyaaradda," ayuu sargaalkan u sheegay HOL.

Mar aan weeydiinnay sababta ay arrintaasi ku dhacday, ayuu sheegay in ilaa hadda aysan garanayn, balse baaritaanka kadib la ogaan doono.

Howlgalka AMISOM oo ay qeyb ka yihiin ciidanka Itoobiya iyo Saraakiisha ciidamada Itoobiya ee Soomaaliya weli kama hadlin arrintan.

Wixii kusoo kordha kala soco Hiiraan Online.


Hiiraan Online News Desk