Gudoomiye Cirro oo ku baaqay taageerayaashiisa inay iskugu yimaadaan maalinta Barri xarunta xisbiga WADDANI
Axad, November, 17, 2019 (HOL)-Gudoomiyaha xisbiga mucaaradka ah ee WADDANI C/raxmaan Maxamed C/llaahi Cirro ayaa taageerayaashiisa ugu baaqay in maalinta Barri iskugu yimaadaan xafiiskiisa ku yaala magaalada Hargeysa si fariimo loogu sheego.
Gudoomiye Cirro ayaa
taageeraashiisa gobolka Maroodi jeex ku koobay isku soo bax ay ku muujinayaan
sida uga xun yahay nidaamka loo soo xulay xubno ka mid ah guddida
doorashooyinka Somaliland.
“taageerayaasha xisbiga WADDANI
ee gobolka Maroodi jeex in barri sideeda subaxnimo iskugu yimaadan xarunta
xisbiga si loogu sheego fariimo muhiim
ah oo qarankan lagu badbaadinayo”ayuu yidhi Cirro oo iskugu yeedhay
taageerayaashiisii.
Sidoo kale, gudoomiyuhu wuxuu
sheegay in eedeenta uu madaxweynuhu xisbiga WADANI ku riixayo Soomaaliya uga
jeedo kala qabinta bulshada, isagoo horana danno siyaasi ugu gaadhay,
haseyeeshee waxay uga digeen isticmaalka kalmadaha kala qaybinaya bulshadda oo
halis galin karta qaranka.
“Muuse, madaxda xisbigiisa
Kulmiye iyo xukuumaddiisuba waxay caadaysteen kuna soo celceliyaan in uu
xisbiga Waddani iyo taageerayaashiisuba gacan saar la leeyihiin Soomaaliweyn,
waxaan umadda u sheegaya in Muuse iyo gacan yareyaashiisu u adeegsadaan ku
celcelinta arrintaa kala qaybinta bulshada walaalaha ah ee reer Somaliland ee
ay ahayd in ay mideeyaan.”ayuu yidhi Cirro, waxaanu intaas ku daray “Waxaan
cambaaraynayna si aan madmadow ku jirin dhaqanka noocaas ah ee uu ku dhaqmayo
madaxweyne Qaran oo ay ahayd in uu umaddiisa mideeyo waxaanu uga digayna haddii
uu hore ugu macaashay uguna dano siyaasi ah oo kooban ha ogaado maanta in ay
sababi doonto kala dirka umadda iyo burburka Qarannimada ay soo dhisteen,”
Sidoo kale, waxa uu gudoomiye
Cirro sheegay in xeerka lagu aasaasay guddida doorashooyinka aanu saxeexin ee
uu waagaasi sameeyeen golihii kahoreeyey oo uu madaxweyne Cigaal saxeexay,
waxaanu yidhi " Xeerka doorashooyinka ee xeer lanbar 20 waxaa saxeexay
madaxweyne Cigaal 2001 masaxeexin Cabdiraxmaan , waxaana lagu ansixiyay golihii
golahan ka horeeyay , waxaanay taasi muujinaysaa sida madaxweynuhu umoogan
yahay xeerarka dalka waana sababta uu xeerarka ugu tumanayo "
Gudoomiyaha xisbiga WADDANI waxa
uu waxgaradka Somaliland ugu baaqay in la iskugu yimaado shir lagu badbaadinayo
Somaliland, taas oo uu sheegay inuu madaxweynuhu halis galinayo.
Barkhad-ladiif M. Cumar, Hiiraan Online
[email protected]
Hargeysa, Somaliland.