Madaxweyne Farmaajo oo magaalada Makka maanta uga qeybgalaya shirka Ururka Iskaashiga Islaamka
Khamiis, May, 30, 20199 (HOL)-Maanta ayaa lagu wadaa in magaalada Makka ee dalka Boqortooyada Sacuudiga uu ka furmo Shir Madaxeedka Ururka Iskaashiga Islaamka (IOC) oo ay ka qeyb geli doonan Madax farabadan oo Carbeed.
Madaxweynaha Jamhuuriyadda Federaalka Soomaaliya Maxamed Cabdullaahi Farmaajo oo xalay gaaray Magalada Barakeysan ee Makka ayaa
ka mid ah Madaxda ka qeyb galeysa iyo Madax kale oo Carbeed.
Shirka oo lagu
marti qaaday hoggaamiyeyaasha 57-dal ee ku bahoobay ururkan ayaa waxaa lagaga arrinsanayaa la dagaallanka waxa loogu yeero argagixisada iyo fikirka gurracan ee xagjirnimada, qadiyadda Falastiin iyo dhibaatooyinka
cunsuriyadeed ee ka dhanka ah Muslimiinta.
Madaxweyne Farmaajo ayaa sidoo kale waxaa uu dalkaasi Sacuudiga uga qyeb geli doonaa Shir Madaxeed aan caadi ahayn oo ay isugu imaanayaan Madaxda dalalka Jaamacadda Carabta, kaas oo lagaga wada hadlayo xaaladaha ugu danbeeyey ee dalalkaas, danaha wada jirka ah ee ka dhaxeeya iyo sidii loogu midoobi lahaa dhibaatooyinka iyo caqabadaha ku xeeran dowladaha iyo shucuubta Carbeed.
Madaxweyne Farmaajo ayaa inta uu joogo magaalada Makka waxaa uu kulamo gooni gooni ah la qaadan doonaa Madaxda Carbeed ee ka qeyb galeysa Shir Madaxeedka Ururka Iskaashiga Islaamka (IOC).
C/raxmaan Diini, Hiiraan Online
[email protected]