Madaxweyne Biixi oo safar shaqo ugu anbobaxay gobolada Bariga Somaliland
Axad, November, 18, 2018 (HOL) -Madaxweynaha Somaliland, Mudane Muuse Biixi Cabdi iyo wefdi uu hoggaaminayo, ayaa markii ugu horeysay sanad ka dib markii la doortay safar shaqo ugu anbobaxay gobolada bariga, taas oo dadweynihii deegaanka uu marayey ku soo dhoweeyeen.
Wefdiga uu hoggaaminayo
madaxweyne Biixi waxa la socday xubno ay ka mid yihiin wasiirrada wasaaradaha
Gaashaandhigga, Mudane Ciise Axmed Yuusuf, Horumarinta Beeraha, Mudane Axmed
Muumin Seed, iyo Diinta iyo Awqaafta, Sheekh Khaliil Cabdilaahi Axmed,
Caafimaadka, Dr. Xasan Ismaaciil Yuusuf, guddoomiye-ku-xigeenka saddexaad ee
xisbiga KULMIYE, Xuseen Aadan Cadde, iyo siyaasiyiin kale oo ay kamid yihiin,
Ambassador Cawil Cali Ducaale, Farxaan Aadan Haybe, xildhibaanno iyo xubno kale
oo xukuumadda ka tirsan.
Madaxweynaha iyo wefdiga uu
hoggaaminayo, ayaa ugu horrayn waxa lagu soo dhoweeyey magaalooyinka u dhexeeya
Hargeysa iyo Berbera, kuwaas oo caleemo
qoyan ku soo dhoweyaneyey.
Maamulka gobolka Saaxil iyo
degmada Berbera iyo shacabweyne tiro badan oo ku dhaqan magaalada Berbera, ayaa
madaxweynaha iyo wefdigiisa kaga horyimi duleedka Galbeed ee magaalada, halkaas
oo uu madaxweynuhu shacabka kula qaatay socod lug ah oo ay ku galeen
magaaladda.
Afhayeenka madaxweynaha Maxamuud
Warsame ayaa warbaahinta uga waramay ujeedadda madaxweynaha, waxaanu yidhi,“Wefdiga madaxweynaha iyo safarkiisu
waxa uu daarran yahay inuu u kuurgalo xaaladaha kala duwan ee deegaannadan iyo
gobolkan ka jira, sidoo kalena waxa uu madaxweynuhu dersayaa dedaalka
horumarineed ee ay xukuumaddiisu guud ahaan deegaannada Somaliland, gaar
ahaanna deegaankan aynnu saaka joogno, waxa uu sidoo kale dardargelin doonaa
hawlihii horumarineed ee halkan ka socday.”
Af-hayeenku waxa uu maamulka
gobolka Saaxil iyo guud ahaanba shacabka ku dhaqan gobolka iyo deegaannada hoos
yimaadda uga mahadceliyey sida ay usoo dhoweeyeen.
Madaxweynuhu inta uu gobolada
bariga marayo ayaa la filayaa inuu mashaariic uu ka hirgaliyey intii uu xukunka
hayey xadhiga ka jaro iyo inuu mashaariic laga hirgalin doonana dhagax dhigo.
Barkhad-ladiif M. Cumar, Hiiraan Online
[email protected]
Hargeysa, Somaliland.
