Wariyayaal Soomaaliyeed oo dalbaday in uu cadaallada la horkeeno dadkii ka danbeeyay dilkii Jamaal Khashoggi
Axad, November, 18, 2018 (HOL) -Iyadoo wali la hadal hayo islamarkaana dood weyn uu ka taagan yahay kiiska dilkii wariye Jamaal Khashoggi oo bishii hore lagu dhaxdilay qunsuliyada Sacuudiga ee magaalada Istanbul dalka Turkiga ayaa markii ugu horeysay arintan waxaa dareenkooda ka muujiyay wariye-yaal Soomaaliyeed.
Koox Weriyayaal ah ayaa isugu yimid barxadda xarunta warbaahinta
Goobjoog iyagoo sita boorrar lagu xardhay sawirrada weriyaha Sucuudiga
ee la dilay iyo erayo ay kamid ahaayeen Jamaal waa inuu helaa Caddaalad.
Maxamed
Boosh oo kamid ah suxufiyiintii maanta ka qeyb galay isu soo baxa
Muqdisho ka dhacay ayaa sheegay inay ka xun yihiin dilka
weriyaha isla markaasna Soomaaliya ay kamid tahay meelaha weriyeyaasha
ay dhibaatada kala kulmaan.
"Waxaan muujineynay sida aan ugu
xunnahay, waxaanu qeyb ka nahay weriyeyaasha adduunka, Soomaaliyana
waxay kamid tahay meelaha suxufiyiintu ay dhibaatooyinka kasoo gaaraan,
tiro badan oo weriyeyaal ah ayaa lagu dilayay ilaa 1991-kii, waanna mid
kamid ah meelaha ugu halista badan ay weriyeyaashu ka howlgalaan" ayuu
yiri Maxamed Boosh.
Masaajido ku yaalla Sucuudi Carabiya iyo Turkiga ayaa salaadda janaasada looga tukaday wariye Jamaal Khaashuqji ee la dilay.
Jamaal
Khaasuqji oo 2-dii bisha October lagu dilay qunsuliyadda Sucuudiga ee
Istanbuul waxaan weli waxaan war ah laga haynin meydkiisa halka uu ku
dambeeyey.
Boqortooyada Sucuudiga waxay sheegtay in amarka lagu dilay Jamaal uu
ka soo baxay xubno ka tirsan sirddoonka Sucuudiga balse Dhaxal sugaha
boqortooyada Amiir Maxammed Bin Salmaan uu wax shaqo ah ku lahayn
dilkiiisa.
Turkigana wuxuu ku adkeysanayaa amarka dilka Khaashuqjii inuu ka soo fulay madaxda ugu sarreysay boqortooyada Sucuudiga.
C/raxmaan Diini, Hiiraan
Online
[email protected]