Su’aal xisaab ah oo jahwareer dhalisay dalka Shiinaha
Arbaco, Janaayo, 31, 2018 (HOL) – Ardeyda dhiggata fasalka Shanaad ee dalka
Shiinaha ayaa la yaabay su’aal xisaab ah oo soo dhaxgashay Imtixaan la soo
hordhigay , taasoo iskaba daa in laga jawaabo e’ xitaan shaki badan la galiyay
sida ay suurta-gal ku noqon karto in su’aal noocaas ah Macalinku weydiiyo
Ardeyda.
Su'aasha la weeydiiyay Ardayda dhiggata fasalka 5aad ayaa
waxaa ay u qoraneyd "Haddii Markab uu wado 26 Ido ah, iyo 10 Riyo ah, meeqa
sano ayuu jiraa Naaquudaha?".
Warqada ay ku daabacneyd su’aashan oo la soo soo galiyay
baraha bulshada ayaa ka yaabisay dadkii arkay, kuwaa sheegay in aysan aheyn su’aal
maan-gal ah oo caqliga banni’aadamku ogolaanayo.
Mid ka mid ah dadka baraha bulshada isticmaala ayaa is-weeydiiyay
in macalinka su'aasha soo qorey uu isaga yaqaano jawaabta iyo in kale.
Saraakiisha Waxbarashada ee dalka Shiinaha ayaase markii
danbe sheegay in su’aashani aheyd mid si qalad ah ku soo dhax-gashay sida ay
hadalka u dhigeen su’aalaha Imtixaanka.
Sheekadan oo lagu daabacay Bogga BBC-da ayaa sidoo kale
lagu sheegay in mid ka mid ah Ardeyda oo isku dayay in uu su’aashan ka jawaabo
sheegay in ugu yaraan Naaquudaha Markabka ka weyn yahay da’da 18 sano, isaga oo
maskaxda ku haya in qof da’daa ka yar aan marnaba loo ogoleyn in uu gadiid
kaxeeyo.
C/raxmaan
Diini, Hiiraan Online
[email protected]