Donald Trump oo xalay jeediyay khudbadiisii sanadka uu xafiiska joogay
Arbaco, Janaayo, 31, 2018 (HOL) – Madaxweynaha dalka
Mareykanka Donald Trump ayaa xalay
shacabka Maraykanka u jeediyay khudbaddiisii u horreysay ee sannadlaha ahayd tan
iyo markii la doortay.
Madaxweynaha oo khudbadan ka hor jeediyay fadhi ay u dhammaayeen xubnaha
labada aqal ee congress-ka Maraykanka ayuu ku sheegay in siyaasaddaha
maamulkiisu ku tallaabsaday sannadkii la soo dhaafay ay sababtay in xaaladda
dhaqaale ee Maraykanku uu kobco, sidoo kalena la abuuro shaqooyin fara badan.
Madaxweynaha ayaa yiri "Ilaa doorashadii, waxaan abuurnay 2 milyan
iyo 4 boqol oo kun oo shaqooyin cusub ah, kuwaas oo ay ku jiraan 200 kun oo
dhinaca warshadaha ah."
Madaxweynaha ayaa dhinaca kale sheegay shaqo la’aantan yaraatay ay sabab u
tahay hanaanka wax ka bedelka cashuuraha ee uu isagu la yimid.
"Ilaa markii aan meel marinay cahsuur dhimista, ku dhawaaad 3 milyan oo
shaqaale ah ayaa helay lacago gunooyin ah, kuwaas oo badankoodu gaaraya
kumanaan dollar oo qofkii uu helay."
Madaxweyne Trump ayaa sheegay in dhaqaalaha kobcay uu dhisayo niyadda iyo
rajada dadka Maraykanka ah. " Kani waa xiligeenii Maraykanka cusub. Ma
jirin xilli ka fiican hadda oo lagu noolaan lahaa riyada Maraykanka."
Trump ayaa dhinaca kale ka hadlay dhinaca horumarinta kaabayaasha
dhaqaalaha, isagoo congresska ka codsaday inay arrimahaas kala shaqeeyaan.
Wuxuu yiri "Caawa waxaan congresska ugu yeerayaa inu soo saaro sharci
keenaya maalgashi dhinaca kaabayaasha dhaqaalaha ah oo ay ku baxayso ugu yaraan
1 tiriyan iyo bar dollar."
Dhinaca socdaalka ayaa sidoo kale uu madaxweyne Trump ka halday, Isaga oo
xusay afar tiir oo lagu hagaajin karo.
Wuxuu yiri " Ka koowaad ayuu inuu noqonayo in jinsiyad la siiyo 1.8
milyan oo caruur ahaa oo waalidkooda keenay. Ka labaad ayuu sheegay inuu yahay
darbi laga dhiso xuduudda koonfureed ee dalka. Tiirka 3aad ayuu ku sheegay la
joojiyo fiisihii bakhtiyaa nasiibka oo dadka lagu soo xulo xirfadooda. iyo
Tiirka 4aad ayuu sheegay in la isku keeno dadka qaraabada dhow ah, sida
xaasaska iyo caruurta yaryar oo loo keeno dadkooda Maraykanka jooga."
Madaxweynaha ayaa dhinaca kale ka hadlay la dagaalanka kooxda ISIS, isaga
oo yiri "Sanadkii hore, waxaan ballan qaaday inaan la shaqeyn doono
xulufadeena, si aan u dunida uga tirtirno ISIS. Sanad ka dib, waxaan ku
faanayaa in xulufadeena aan u sheego in ISIS laga xoreeyey 100% dhulkii ay ka
haysteen Ciraaq iyo Suuriya. Hase yeeshee ay shaqo badani harsan tahay. Waxa uu
yiri waan sii wadeynaa la dagaalanka ISIS ilaa aan ka jabino."
Trump ayaa sidoo kale ka hadlay xabsiga Guantano Bay ee dalka Cuba’’ Waxaa
xajinayaa ballantii. Waxaan saxeexay wareegto aan xoghaye Mattis ugu sheegayo
inuu dib u eego siyaasadaha xabsiyada militariga oo xabsiga Guanatanaman si uu
u sii furnaado."
C/raxmaan
Diini, Hiiraan Online
[email protected]
