Cabdi Qeybdiid : Wali waxba lagama qaban saraakiishii amray weerarkii lagu qaaday Gurigeyga
Sabti, Feberaayo, 03, 2018 (HOL) - Gudoomiyaha Guddiga
Dastuurka labada Golle ee Baarlamaanka Senator Cabdi Xasan Cawaale Qeybdiid oo
maanta shir jaraa’id ku qabtay magaalada Muqdisho ayaa si kulul uga hadlay
weerarkii bil ka hor gurigiisa lagu qaaday.
Waxa uu sheegay Cabdi Qeybdiid iney jiri karto qatar ku
wajahan isaga iyo qoyskiisa, waxa uuna ku dhaliilay dowladda Federaalka in
aysan wax ka qaban dadkii ka dambeeyay weerarkii 30-kii December 2017 lagu
qaaday hoygiisa.
Cabdi Qeybdiid ayaa sheegay in weerarkii gurigiisa lagu
qaaday la doonayay in isaga lagu dilo balse ilaahey ka bad baadiyay, waxaa uuna
tilmaamay in arrintan aysan kaligii qatar ku ahaan karin ee sidoo kale ay
ku tahay cid walbo oo kamid ah madaxda dowladda .
Waxa uu xusay Senator Cabdi Qeybdiid weerarkii lagu qaaday
gurigiisa uu ka qaaday murugu badan, waxa uuna tilmaamay in qoyskiisa wali ay
dareemayaan cabsidii ay ka qaadeen weerarkaasi.
Gudoomiyaha Guddiga Dastuurka labada Golle ee Baarlamaanka
ayaa ugu baaqay labada Golle ee Baarlamaanka in Guddi baaritaan u saaraan
arintan si uu uga bad baado qatar kale oo noloshiisa ku timaada.
Dowlada Federaalka Soomaaliya ayaa weerarkii Cabdi Qeybdiid
gurigiisa ku qaadeen ciidamo ka tirsan milatariga Soomaaliya waxaa ay u saartay
guddi baaritaan, hassa ahaatee ma jirto wali wax natiijo ah oo kasoo baxday
baaritaankaasi.
C/raxmaan Diini, Hiiraan Online
[email protected]
