Sarkaal ka tirsanaa Ururka Al-shabaab oo lagu dilay gobolka Baay
Jimco, Feberaayo, 02, 2018 (HOL)- Maamulka
degmada Diinsoor ee gobolka Baay, ayaa sheegay in Sarkaal Al-shabaab ka
tirsanaa lagu dilay hawlgal ka dhacay duleedka degmadaasi, iyadoo tiro kale oo
Al-shabaab ahna gacanta lagu dhigay.
Gudoomiyaha degmada Diinsoor Ibraahim Maxamed Nuur (Shig-shigow) oo la
hadlay warbaahinta ayaa sheegay in hawlgal ay Khamiistii iska kaashadeen
ciidamada xoogga Dalka iyo kuwa AMISOM oo ka dhacay deegaanka Raaxoole lagu dilay sarkaalka Al-shabaab ka tirsanaa.
Sarkaalkan la dilay, ayuu sheegay in uu ahaa mid hoggaaminayay dagaalyahano
20 gaareysa oo Al-shabaabka tirsan, laguna weeraray deegaanka Raaxoole oo 50-KM
u jirta Degmada Diinsoor, sida uu yiri.
Sidoo kale wuxuu sheegay in hawlgalka lagu soo qabtay Saddex ka mid ah
Al-Shabaab, kuwaas oo sida uu sheegay la keenay degmada Diinsoor, isla-markaana
ay cadaalladda horgayn doonaan.
Al-shabaab ayaa ka howlgala deegaanno ka tirsan gobollada
Baay iyo Bakool iyadoo halkaa marar badan ay ku dagaalameen ciidamada dowladda.
C/raxmaan Diini, Hiiraan Online
[email protected]