Mukhtaar Rooboow oo lagu oo dhaweeyay magaalada Baydhabo ee xarunta gobolka Baay
Khamiis, Feberaayo, 01, 2018 (HOL) – Garoonka diyaaradaha magaalada Baydhabo
waxaa ka degtay diyaar gaar ah oo sida wafdi uu horkacayay Sheekh Mukhtaar
Rooboow Cali Abuu-Mansuur oo ka tirsanaan jiray hogaanka sare ee
Al-shabaab laakiin markii danbe sheegay in uu isaga baxay.
Amaanka magaalada Baydhabo ayaa siweyn loo adkeeyay waxaana garoonka ku soo
dhaweeyay wafdiga Rooboow mas’uuliyiin ka tirsan maamulka Koonfur Galbeed.
Socdaalkiisa magaalada Baydhabo waxaa ku wehlinayay saraakiil ka tirsanaa
maamulka Koonfur Galbeed oo ka raacay magaalada Muqdisho.
Mukhtaar Rooboow ayaa markii uu isaga baxay Al-shabaab waxaa uu deegaanno ka
tirsan gobolka Bakool uu kula dagaalamay xoogag ka tirsan Al-shabaab, isaga oo
markii danbe isku soo dhiibay dowladda federaalka, isaga oo cambaareeyay falalka Al-shabaab ay kula dhaqmeen bulshada Soomaaliyeed.
Mudada uu joogo Baydhabo ayaa la filayaa in uu kulamo kala duwan la qaato
madaxda iyo sarakiisha maamulka Koonfur Galbeed, gaar ahaan madaxweyne Shariif
Xassan Sheekh Aadan.
C/raxmaan Diini,
Hiiraan Online
[email protected]
