Sanbaloolshe : Dowladda ayaa ku Lug laheyd doorashadii leyga guuleystey ee ka dhacday Jowhar
Khamiis, Feberaayo, 01, 2018 (HOL) - Taliyihii hore
ee hay’adda nabad-sugida iyo sirdoonka Qaranka Cabdullaahi Maxamed Cali
Sanbaloolshe oo wareysi siinayay
Idaacada VOA ayaa dhaliilay habkii ay u dhacday doorashadii Kursiga xubinnimada baarlamaanka ee
dhawaan lagu qabtay magaalada Jowhar.
Wuxuu sheegay Sanbaloolshey
in dawladdu ay faragelin ku samaysay doorashadaasi isla markaana ay dhaqaale ku
taageertay musharraxa ku guulaystay Nuur
Iidoow Bayle oo ku soo baxay 27 cod, halka Sanbaloolshe uu helay 24 cod.
Sanbaloolshe ayaa intaa ku
daray in uusan doorashada ku faraxsaneyn laakiin uu isaga qancay, madaama ayuu
yiri ay iska muuqatay in dowladdu wadatay musharaxa Nuur Iidoow Beyle.
'' Iyadoo dowladdu ay sheegato in ay la dagaalameyso musuqmasuqa, dhinaca kalana la og-yahay daruufaha kala duwan ee nolaleed iyo Amni ee dalka ka jira in doorashada Kursi kaliya ku bixiso lacag dhan hal Milyan oo dollar waa wax aad looga xumaado, waxaa ka wanaagsanaan laheyd in lacagtaa la galiyo mashaariicdii faraha badneyd ee uu madaxweynuhu dhagax -dhiggay mudaddii uu ku maqnaa safarkii uu ku tagay gobollada dalka'' ayuu yiri Sanbaloolshe.
Wuxuu beeniyay shakiga laga qabey ee ah haddii uu ku soo bixi lahaa doorashada in uu
ka mid noqon lahaa xildhibaannada mucaaradsan dowladda, isaga oo sheegay in
isaga iyo madaxda Qaranka ahaayeen dad aad isugu dhaw laakiin sida uu hadalka u
dhigay dadka kale u kala sheeko xumeeyeen.
Dhinaca kale markii uu hadalkaas ka soo baxay waxaa arrinatn ka hadlay Nuur
Iidow Beyle oo ah xildhibaanka guuleystay, wuxuuna sheegay in aysan waxba ka
jirin hadalka ka soo yeeray (Sambaloolshe), Doorashadana ay ku dhacday si xor
iyo xalaal ah.
Xildhibaanka ayaa sheegay in doorashada goob joog ka ahaayeen madaxweynaha
Hirshabeelle Maxamed Cabdi Waare, ku xigeenkiisa, Guddiga Doorashooyinka,
Madaxda Gobolka kan degmada, Warbaahinta iyo Qeybaha kala duwan ee bulshada
rayidka.
Kursigan ayaa waxaa ku tartamayay ilaa Lix Musharax oo kala ahaa C/laahi
Maxamed Cali Sambaloolshe Taliyihii hore ee NISA, Cali C/laahi Cosoble
Madaxweynihii hore ee Hirshabeelle, Dahir Cabdulle Cawaale, Nuur Iidow Beyle,
Dahabo Xasan Axmed iyo Xuseen Axmed Geelle.
C/raxmaan Diini, Hiiraan Online
[email protected]
.
