Hargeysa:Shirkii golaha wasiiradda ee cusub oo maanta qabsoomay iyo Toddoba qodob oo laga soo saaray
Sabti, December, 16, 2017 (HOL)- Madaxweynaha cusub ee
Somaliland Muuse Biixi Cabdi ayaa kulankii ugu horeeyey la yeeshay golihiisa
wasiiradda ee cusub, waxaana shirkaasi laga soo saaray toddoba qodob oo iyaga
khuseeya.
Fadhigan golaha wasiiradda waxa
ka soo qaybgalay 31 xubnood oo ka mid ah 32 xubnood ee golaha wasiiraddu ka
kooban yihiin.
Madaxwyne Muuse Biixi Cabdi waxa
uu kalfadhigaa ka sheegay in xukuumaddan hiigsigeeda uu saldhig u yihiin Balanqaadyadii iyo Barnaamijkii Xisbigu ku galay
ololaha iyo Qorshaha horumarinta Qaran
ee labaad (NDPII).
“Kulankaa ugu horeeyey oo qaatay muddo saacado ah,
wuxuu ahaa kulan isbarasho iyo is xog waraysi. Madaxwaynuhu wuxuu si gaara
hoosta uga xariiqay muhiimadda ay leedahay Muwaadinimada wada jirka ummadda
aynu masuulka ka nahay, isagoo Golaha faray in juhdi iyo dadaal midaysan loo
galo sidii umadda loo midayn lahaa, loogana saari lahaa xanaftii ka dhalatay
tartankii ololaha doorashada.”ayaa lagu yidhi qoraalka xafiiska madaxweynaha ka
soo baxay.
Shirkan waxa laga soo saaray
toddobadan qodob oo kala ah:
1. Waxaa dhamaan golaha lagu dhaariyey inay ilaashaan sirta
golaha wasiirada iyo ta qarankaba.
2. In Golaha Wasiiradu ay diiwaan geliyaan
dhammaan hantidooda (guurtada iyo maguurtadaba).
3. In dhammaan Golaha wasiiradu ay keenaan
xogta shaqsiga ah ee sharcigu waajibiyey ee
looga baahan yahay oo dhamays tiran.
4.In la qabto kulano joogta ah oo la
xidhiidha qaabka wada shaqaynta iyo xoojinta shaqada ay wasiiraduhu qaranka u
hayaan.
5. In dhammaan gobolada dalku ay u
sinnaadaan caddaladda iyo horumarka.
6. Maadaama ay wasiiradu yihiin masuuliyiin
Qaran loona igmaday xil qaran, waa inaan loo arag wasiir qolo, mid qoys iyo mid
qabiil toona, sidaas darteedna ay reeban tahay in Wasiiradu ay ka qayb galaan
casuumado beelaysan oo Wasiirka ay beeshiisu
si gooniya ugu maamuusayo.
7. In xafladaha xilwareejinta ee
mas’uuliyiinta cusubi ay kala wareegayaal mas’uuliyiinta xukuumaddii hore ay
reeban tahay in lagu qabto meel ka baxsan xarumaha dawladda.
Barkhad-ladiif M. Cumar,
Hiiraan Online
[email protected]
Hargeysa, Somaliland.