Mareykanka oo sheegay in uu joojiyay saadkii uu sii jiray militariga Soomaaliya
Khamiis, December, 14, 2017 (HOL) – Mareykanka ayaa shaacisay in uu joojiyay gaargaar isugu jiray cuno iyo shidaal uu siin jiray militariga Soomaaliya arintan oo lala xiriirinayo musuq maasuq iyo wax is daba-marin.
Maraykanka ayaa marka laga soo tago ciidamada qalaba sida
ee Soomaaliya sidoo kale waxaa ay taakuleyn siiyaan ciidamada nabad ilaalinta ee
Midowga Afrika oo gaaraya 22,000 oo askari.
Warkan oo lagu daabacay wakaalada Wararka Reuters ayaa
intaa ku daraya in Mareykanku sheegay wada hadal ay yeesheen dowladda
Soomaaliya isla garteen in taliska militariga ku guul dareystay isla xisaabtan
dhab ah oo la xiriira gargaarka uu ku bixiyo Mareykanka taakuleynta ciidamada.
“Waa arrin run ah in laga wada hadlay sida
taageerada loo isticmaalo iyo qaabka loo qeybiyaba. Dowlada Federalka arrintan
waa ay ku howlan tahay sidii xal loogaga gaari lahaa.”sidaa waxaa yiri Wasiirka
gaashaandhiga Soomaaliya Maxamed Mursal oo la hadlay Reuters.
Dhinaca kale Warar Xog-ogaal ah oo ay ka heshay Hiiraan
Online Bankiga Dhexe ee Soomaaliya ayaa sheegaya in la diyaariyay dhamaanba howlihii
la xiriiray mishaar siinta ciidamada oo
Askari walba loogu tala-galay in uu mishaarkiisa ku qaato Account u gaar ah laakiin wali dhinaca taliska
militariga soo gudbin macluumaadkii
looga baahnaa si loo siiyo mishaarkooda, halka ciidamada Booliiska durbaba
bilaabeen in ay mishaarkooda ku qaataan Account u gaar ah Askari walba.
Talaabada uu Mareykanku kaga joojiyay saadkii uu siin
jiray militariga Soomaaliya ayaa la leeyahay waxaa ay dhabar jab weyn ku noqon
kartaa nabad-galyada gudaha dalka Soomaaliya, iyadoo ciidamada AMISOM isku diyaarinayaan in ay ka baxaan
Soomaaliya, taasoo la leeyahay waxaa ay awood siin u tahay dagaalamayaasha
Al-shabaab oo marka danbe qatar iyo halis dhinaca Amniga ah ku keeni kara
dowladdaha dariska ah.
C/raxmaan Diini, Hiiraan Online
[email protected]
