Madaxweyne Farmaajo iyo qaar ka mid ah madaxda dowlad gobolleedyada oo u anbaxay magaalada London
Talaado, May, 09, 2017 (HOL) – Waxaa goor dhaw ka anbabaxay
garoonka diyaaradaha magaalada Muqdisho madaxweynaha dowladda Soomaaliya
Maxamed Cabdullaahi Farmaajo iyo qaar ka
mid ah madaxda dowlad gobolleedyada oo ku sii jeeda shirka la filayo in
maalinta Khamiista ah si rasmi ah uga
furmo magaalada London.
Wafdiga madaxweynaha ayaa waxaa ka mid ahaa ra'iisal wasaare ku-xigeena dalka, wasiirka
wasaarrada gaashaandhiga iyo xubno ka tirsan la taliyayaashiisa, iyo madaxweynayaasha dowlad gobolleedyada Koonfur galbeed,
Hirshabeelle iyo Galmudug.
Madaxweynayaasha Jubbaland iyo Puntland ayaa maalmo ka hor u sii ambabaxay
Nairobi, iyagoo London uga sii gudbaya, waxaana lagu wadaa inay caawa gaaraan
magaalada London.
Shirka London ee looga hadlayo arrimaha Soomaaliya ayaa furmi doona 11-ka
bishan oo ku beegan maalinta Khamiista, iyadoo maalinta berri ay dhici doonaan
shirar horu dhac.
Shirka ayaa qodobada lagu soo qaadi doono waxaa ka mid ahaa taageerida
Soomaaliya ee dhinacyada, siyaasada, Amniga, dib u dhiska, kobcinta dhaqaalaha
iyo qodobo kale.
Madaxweynaha Soomaaliya, Ra’iisul Wasaaraha Britain iyo Xoghayaha Guud ee
Qaramada Midoobey ayaa si wadajir u shir guddoomin doona shirka.
C/raxmaan Diini, Hiiraan Online
[email protected]
