Xisbiga WADDANI oo cabasho uu ka tirsanayo xukuumadda u gudbiyey madaxweyne Siilaanyo
Isniin, May, 08, 2017 (HOL)- Musharaxa madaxweynaha ee xisbiga
WADDANI Cabdiraxmaan Maxamed Cabdilaahi Cirro ayaa sheegay inay kulan gaar ah
la yeesheen madaxweynaha Somaliland Axmed Maxamed Siilaanyo,isla markaana u
gudbiyeen cabasho ay qabaan.
Gudoomiyaha golaha Wakiiladda
Cabdiraxmaan Cirro ayaa sheegay inay madaxweynaha u gudbiyeen dareenka beesha
caalamku ka qabaan arrimaha doorashooyinka iyo dimuqraadiyada, waxa kale oo uu
sheegay in cabashooyin isbarkan oo dhinaca xukuumadda ka tirsanayaan u
gudbiyeen si wax uga qabto, waxaanu gudoomiye Cirro ku dooday in xisbiyadda
mucaaradka shaqadooddu tahay kaliya inay wax dhaleeceeyaan oo xukuumadda mar
walba wax ka sheegaan, taasna ay xukuumaddii diidantahay.
“Anagoo ka wakiila ah xisbiga WADANIi waxa
madaxweynaha la kulmay aniga iyo Cabdiqaadir Jirde, fariin tii aanu ka qaadnay
xisbiga ayaanu madaxweynaha kala hadalnay, mid wuxuu ahaa arirnta
dimuqraadiyada iyo doorashada, madaxweynaha waan kala hadlay in arrimaha doorashooyinka si dhow looga wado
hadlo oo garoon loo siman yahay lagu tartamo in laga digtoonaado waxyaabaha
sababi karta in doorashaddu dib u dhacdo,waxa kale oo aan u gudbinay dareenka
beesha caalamku ka qabto dib u dhac ku yimaadda doorashooyinka iyo
dumuqraadiyadda”ayuu yidhi Cirro.
Guddoomiye Cirro waxa kale oo uu
sheegay in uu u gudbiyey madaxweynaha cabashooyin ay ka tirsanayan xukuumadda,
waxaanu yiri “Cabashooyin is barkaday oo faro badnaa oo xisbigu ka tabanayey
habka loola dhaqmay masuuliyiin xidhxidhan oo xisbiga ka tirsan iyo arrimaha in
lagaga wado hadlo, marka duruufo sidaas oo kale soo kordhaan, waanu ka wada
hadalnay in masuuliyiinta xisbiga la siiyo mudnaanta ay leeyihiin, in xisbiga
mucaaradku dambi noqonin inuu xukuumadda dhaleeceeyo oo shaqadiisu tahay inuu
xukumada wax ka sheego ama dhaleeceeyo, waxaanu isla garanay in wixii soo kordha xukuumada iyo asxaabta iyo
guddida doorashooyinka marka loo baahdo si wada jir ah iskugu yimaadaan.”
Xisbiga mucaaradka ah ayaa ka
cabanaya xukuumadda, waxaanu sheegay in
masuuliyiin ka xidhan kala hadleen madaxweynaha.
Barkhad-ladiif M. Cumar,
Hiiraan Online
[email protected]
Hargeysa, Somaliland.