Wadatashiga dib u eegista dastuurka oo markii ugu horeysay laga qeybgalinayo naafada
Isniin, May, 08, 2017(HOL) – Wasaaradda Dastuurka xukuumada Soomaaliya ayaa
markii ugu horeysay wadda tashi la xiriira dib u eegista dastuurka la
yeelaneysa dadka naafadaha ee qaba baahida gaarka ah.
Wasiirka wasaaradda dastuurka C/raxmaan Xoosh Jabriil oo ka hadlay shirka
ayaa sheegay in wasaaraddu ku dhiiragelinayso dadka naafada ah in ay ka
qaybgalaan olalaha dib u eegista dastuurka.
“Waxaa tihiin muwaadiniin xaq u leh waxa muwaadiniinta kale xaq u leeyihiin,
waxa aan hubin doonnaa in dastuurka uu noqdo mid idiin daryeela islamarkaana
xuquuqihiina tilmaama” ayuu yiri wasiir Cabdi Xoosh.
Dhanka kale, ka soo qaybgalayaasha ayaa wasaaradda ugu mahadceliyay sida ay ugu
dhiiratay in ay kulankan la qaataan oo ay talladooda dhageystaan, iyaga oo ku dhiirageliyay wasiirka iyo dhamaan
shaqaalaha wasaaradda in ay qareen u noqdaan dadka baahiyaha gaarka ah qaba.
Ugu dambeyn, wasiirka ayaa ballan qaaday in dhamaan maamul goboleedyada
dalka la gaarsiin doono kulamadan wadatashiga ah si dadka ay ugu dhiiradaan in
taladooda ay uga qaybqaatan ololaha hanaanka dib u eegista dastuurka oo
wasaaraddu ay ka go’antahay in uu noqdo mid daah-furan.
C/raxmaan Diini, Hiiraan Online
[email protected]