RW ku-xigeenka : Ma sahlana in la gaaro doorasho qof iyo cod ah sanadka 2020-2021
Isniin, May, 08, 2017(HOL) – Ra’iisal wasaare ku-xigeenka xukuumadda
Soomaaliya Mahad Maxamed Guulleed oo hadal ka jeediyay kulan ay soo
qabanqaabisay wasaarrada arimaha gudaha iyo federaalka ayaa sheegay in aysan
aheyn howl sahlan gaarista doorasho qof iyo cod ah, hasse ahaatee dowladda
federaalka arintan ku dadaali doonto.
‘’In doorasho qof iyo cod ah la gaaro sanadka 2020- 2021 ma’aha arin sahlan,
waxaan u baahannahay in dastuurka dib loogu noqdo taa oo macnaheedu yahay kala
xadeynta nidaamka awooda federaalka dowlad gobolleedyada iyo dowladda dhexe,
waxaa kaloo loo baahan yahay in sharci loo diyaariyo oo laga shaqeeyo arintan laakiin waa
in heshiis laga yahay marka hore gudiga doorashooyinka Qaranku muxuu xaq u leeyahay muxuuse
qabanayaa iyo sidoo kale guddiyada doorashooyinka heer gobol maxey xaq u
leeyihiin, waxaa kaloo meesha ku jira xeerka jinsiyada oo u baahan in iyana
laga heshiiyo madaama loo baahan yahay in la diyaariyo diiwaangalinta Madaniga ah si muwaadinku u helo ID Care -ka codeynta iyo in la helo guud
ahaanba tirkoobka dadweynaha Soomaaliyeed oo sax taasoo asal u ah in doorasho
qof iyo cod ah ay dhacdo’’ ayuu yiri ra’iisal wasaare ku-xigeenka.
Dowladda Soomaaliya ayaa sheegtay in ay go’an tahay in ay ka shaqeeyaan
sidii shacabka Soomaaliyeed ay u soo dooran lahaayeen qofka ay rabaan.
Balanqaadkan ah in dalka ay ka dhacdo doorasho dadweyne ayaa ka mid ahaa
qorshayaashii dowladdii uu madaxweynaha ka ahaa Xassan Sheekh Max’uud oo
laakiin markii danbe shaacisay in aan la qaban karin doorasho qof iyo cod ah
sababo iyo daruufo markaa jiray awgood, hasse ahaatee lama oga sida dowladda
hadda jira arintan ugu guuleysan karto.
C/raxmaan Diini, Hiiraan Online
[email protected]
