Dowladda Soomaaliya oo sheegtay in la dilay horjooge sare oo ka tirsanaa Al-shabaab
Axad,May ,07, 2017 (HOL) – Dowaladda Soomaaliya ayaa sheegtay in 05 tii
bishan howlgal ballaaran oo ciidamada dowladda iyo kuwa Mareykanka ka fuliyeen
deegaanno ka tirsan gobolka Shabeellaha hoose lagu dilay horjooge sare oo ka
tirsanaa ururka Al-shabaab.
War qoraal ah oo ka soo baxay dowladda Soomaaliya ayaa lagu sheegay in dilka
horjoogahan oo lagu magacaabi jiray Macalin Cismaan Cabdi Baadil muujineyso hoos
u dhaca ku yimid awoodii kooxda.
“Dilka horjoogahan waxaa ay
muujineysaa sida loo wiiqay awoodii kooxda ee gobolka Shabeellaha hoose ayaa
lagu yiri qoraal ka soo baxay dowladda federaalka Soomaaliya.
Sidoo kale dowladda federaalka ayaa sheegtay in hawlgalka lagu dilay sarkaalkaasi
oo dhacay habeenkii Jimcaha uu yahay mid lagu xoojinayo dagaalka lagula jiro
Al Shabaab
Qoraalka ayaa ugu danbeyntii lagu sheegay in dhalinyarrada ka tirsan
Al-shabaab loogu baaqayo in ay isaga soo baxaan ururka.
Howlgalka ciidamada dowladda iyo kuwa Mareykanka ay ka fuliyeen gobolka
Shabeellaha hoose ayaa lagu dilay askari ka tirsanaa ciidamada Mareykanka.
C/raxmaan Diini, Hiiraan Online
[email protected]