Soomaliland oo joojisay Muxaadarooyin ku saabsan qadiyada Soomaliland oo Prof Bulxan ka jeedin lahaa Xamar
Axad,May,07, 2017 (HOL)- Dr:Xuseen Cabdilaahi Bulxan oo ah
aqoonyahan horena u ahaa gudoomiyihii jaamacadda Hargeysa, ayaa sheegay
in uu go’aansaday inuu ka joogo tagitaankii magaaladda Muqdisho ee uu hore u
shaaciyey inuu dooddo uu kaga hadli doono qadiyadda Somaliland ka jeedin doono
jaamacadaha Muqdisho kadib markii xukumadda ka joojisay inaanu arrimahaasi
dhex galin.
Bulxan ayaa sheegay in xukuumaddu u sheegtay in arrintani
ugub ku tahay,isla markaana aanay hore u dhicin in Hargeysa dhexdeedda qof ka
shaaciyo inuu Muqdisho arrimo siyaasadeed u tagayo, sidaas darteed uu u
baajiyey caasimaddii uu ku lahaa Muqdisho.
“Aniga Xukuumad ima casuumin ee waxa I casuumay waxay
ahaayeen aqoonyahan aanu wada hadal yeelanay oo aniga xagayga sharaf ka leh, oo
xal raadin dhab ah ku jira”ayuu yidhi Dr:Bulxan oo ka hadlayey sababta ugu
wacan inuu Xamar u tago.
Mar la waydiiyey sababta xukuumaddu ugu diiday iyo waxay u
cuskanayaan, waxa uu yidhi “waxay yidhaahdeen arrinkani waa mid ugub ah, oo aan
hore u dhicin, qof inta uu Hargeysa isa soo dhex istaago yidhaahdo xamar baan
tagayaa oo aan ka hadlayaa waa arrin cusub ayey yidhaahdeen, wuxuu u
horseedayaa arrinkaasi mushkilado kale oo noo muuqdo oo qaar kale sidaas iskaga
dhaqaaqaan, waxay yidhaahdeen wada hadalka xukuumaddii baa gacanta ku haysa
marka in ay iyaga uun ku eekaato oo hawsah waddo ayaa nala quman”.
Bulxan waxa uu sheegay in aanu qofna mataleen balse si
aqoonyahan ahaan uun uu u tagayo Muqdisho,haseyeeshee xukuumaddu ay ka gaws
qaniintay inuu Hargeysa ka tuullo oo uu toos u tago Xamar.
Dhinaca kale, Xukuumadda Somaliland ayaa ka hadashay sababta
uga joojiyeen Dr;Bulxan inuu Muqdisho u tago arrimo qadiyada Somaliland,
waxaana sheegeen in xukuumadda loo igmaday arrimaha wada hadalka u dhexeeya
Somaliland iyo Soomaaliya.
Wasiirka Arrimaha Dibadda Somaliland Dr:Sacad Cali Shire oo
ka hadlaya sababta looga joojiyey Bulxan inuu Muqdisho tago waxa uu yidhi
“arrinka wada hadalka ee inaga dhexeeya wuxuu baarlamaanku u igmaday xukuumadda
cid kale looma igman, wada hadalkaasi waa mid caalami ah oo labadda wadan u
dhexeysa, dadkeenu way tagaan Muqdisho oo ganacsi iyo danno kale u tagaan
laakiin wada hadalka xukuumada mooyee cid kale looma ogola, waana is aragnay
Bulxan waana u sheegnay in wakhtigan munaasib ku ahayn.”
Mar la waydiiyey sababta ugu diidayaan mar haddii uu
Dr, Bulxan dariiq ka duwan ta xukuumadda uu qaadayo oo uu arrimaha ictiraafka
uun kaga hadlayo, waxaa uu yidhi Wasiir Sacad “cidda wax inaga dhexeysa waa
dawladda Soomaaliya ee maaha aqoonyahanka Soomaaliya, wixii inaga dhexeeyana
waxa la isla gartay in meel caalamiya lagaga wada hadlo, dawlad ka dawlad,
dawladdu way adeegsanaysaa aqoonyahankeedda oo mar Bulxan wuu noo raacay
Ankara, isagoo dood la gallay aqoonyahanno Soomaaliya ah si fiican
wuu uga hadlay waana ku bogaadinayaa Bulxan sida uu arrimaha Somaliland uga
hadlo, marka wax isaga loo diiday maaha nidaamka sidaas ah”.
Si kastaba ha ahaatee, Prof Bulxan ayaa dhowaan madal ay
iskugu yimaadeen aqoonyahano reer Somaliland ka shaaciyey inuu casuumad ka
helay aqoonyahanno Soomaaliya ah,isla markaana uu muxaadarooyin uu kaga hadlayo
qadiyadda Somaliland iyo madax banaanideeda ka jeedin doono, waxayna noqonaysay
markii ugu horeyso oo muxaadarooyin ku saabsan qadiyada Somaliland Jaamacadaha
Muqdisho laga jeediyo, haseyeeshee xukuumadda ayaa safarkiisa joojisay.
Barkhad-ladiif M. Cumar, Hiiraan Online
[email protected]
Hargeysa, Somaliland.