Kulan looga hadlayay ka hortaga cudurro ka dhalan kara roobabka oo ka dhacay Laascaanood
Sabti, May, 06, 2017 (HOL) – Kulankan oo ay ka qaygaleen maamulka gobolka, degmada, gudiga
abaaraha, caafimaadka, dhalinyarada, hay'adaha caalamiga ah iyo kuwa wadaniga
ah ayaa waxaa si weyn loogu lafaguray sidii loo xakamayn lahaa hadii shuban biyood
ka bilaabmo gobolka.
Gudoomiyaha Gobolka Sool Cabdi
Khayre Dirir oo shirka ka hadlay ayaa
waxaa uu sheegay in cabsi weyn laga qabo shuban ka dhasha gobolka maadaama
waqtigan ay roobab da'een isla markaana aysan noqon kuwo nadiifiya dhulka.
"Waxaan isugu yeernay dhamaan
cida ay qusayso ee wax ka qaban karta, waxaana isla garanay in aan dhisno
gudiyo kala duwan oo ka shaqeeya Gurmadka iyo wacyigelinta" waxaanu xusay
in ka hortagu ka wanaagsan yahay daaweynta.
Kusimaha Isuduwaha caafimaadka gobolka
Sool Dr. Bille X. Maxamuud ayaa waxaa uu sheegay in meelo ka mid ah gobolka
keysas laga helay balse si degdeg ah looga hortegey laguna guulaystey.
Bille waxaa uu tilmaamay in dawladda
hoose ay joojisey booyadaha biya soo dhaamiya balse taas ay haatan ku bedeleen
in biyaha lagu daweeyo kaantaroolada intaanay soo gaadhin magaalada.
Qaar badan oo ka mid ah dadkii
halkaasi ka hadlay ayaa waxay dhamaantood tilmaameen baahida loo qabey dadaal
iskaashi oo lagaga hortago shhuban biyoodka oo aafeeyey degaano badan.
Shirkan ayaa waxaa sababay ka dib
markii ay degaanada Buuhoodle inka badan boqol qof ay u dhinteen kumanaan qofna
laga badbaadiyey, taasina ay sababtay in diyaargarow la sameeyo maadaama isu
socodka dadku uu yahay mid furan.
Seynab Cabdi Warsame
[email protected]
Laascaanood G. Sool