Dowladda Itoobiya oo deeq raashin ah ku wareejisay maamulka gobolka Hiiraan +Video
Sabti, May, 06, 2017 (HOL)
- Wakiil ka socday safaraada Itoobiya ee
Soomaaliya oo ay wehliyaan saraakiisha ciidamada Itoobiya ee qeybta ka ah
howlgalka midowga Africa AMISOM ayaa maanta deeq raashin ah ku wareejiyay
maamulka gobolka Hiiraan.
Sarkaal u hadlay ciidamada
Itoobiya ee ka tirsan howlgalka AMISOM ayaa sheegay in deeqday raashinka ka soo
gudbiyeen xadka ay wadaagaan labada dowladood Soomaaliya iyo Itoobiya shan
cisho ka hor, hasse ahaatee maanta si rasmi ah loogu wareejiyay mas’uuliyiinta
maamulka gobolka Hiiraan.
‘’Raashinkan waxaa ku
deeqay dowladda Itoobiya, annaga oo ah ciidamada Itoobiya ee ka tirsan
howlgalka midowga Africa ayaa ka soo gudbinay xadka labada dowladood, maanta
ayeey suurtagashay in lagu wareejiyo maamulka gobolka Hiiraan’’ ayuu yiri
sarkaalka u hadlay ciidamada Itoobiya.
Sarkaalka ayaa intaa ku
darray in magaalada Addis Ababa ka soo anbabaxeen ilaa 50 gadiid ah oo sida
gargaar loogu talagalay dadka ay abaaraha ku dhufteen kuwaa oo loo kala diray
deegaanno kala duwan oo ka tirsan dalka Soomaaliya.
‘’Raashinkan waxaa la
gaarsiiyay dhamaan deegaannada ay ka howlgalaan ciidamada Itoobiya, kaddib
markii codsi arintaa la xiriira loo gudbiyay safaarada Itoobiya ee Soomaaliya’’
ayuu yiri sarkaalka u hadlay ciidamada.
Wakiilka safaarada Itoobiya
oo goobta ka hadlay ayaa sheegay in raashinkan uu ka kooban yahay 1689 Kiintaal oo Bariis ah, 1666 Kiintaal oo
Bur ah, 3472 Kartoon oo Buskut ah iyo Kumannaan
kartoon oo caano ah.
‘’Safaarada oo ka warqabta
dhibaatada abaarta ee ka jirta dalka ayeey ku deeqeen gargaarkan oo ah mid
ballaaran oo la gaarsiiyay dhamaanba deegaannada ay ka howlgalaan ciidamada
Itoobiya’’ ayuu sheegay wakiika safaarada Itoobiya.
Guddoomiyaha maamulka
gobolka Hiiraan Cali Jeyte Cismaan oo ka hadlay goobta raashinkan lagu
wareejiyay ayaa u mahad celiyay dowladda Itoobiya, isaga oo sheegay gargaarkan
uusan aheyn kii ugu horeeyay oo ay ku deeqdo dowladda Itoobiya, hasse ahaatee
raashinkan lagu soo beegay xili ay siweyn ugu baahnaayeen bulshada ku dhaqan
gobolka.
C/raxmaan Diini, Hiiraan Online
[email protected]