Maamulka Hirshabeelle oo xabsiga dhigay wariyihii Universal TV ee magaalada Jowhar
Jimco, May, 05, 2017
(HOL) -- Maamulka Hirshabeelle ayaa
xabsiga dhigay wariyihii TV Universal ee magaalada Jowhar Ismaaciil Cabdulle
Sabriye, halka sidoo kale howlaha Tvga laga mamnuucay deegaannada uu ka arimiyo
maamulka.
Mahad Xassan Cismaan oo ah wasiirka wasaarrada warfaafinta
maamulka Hirshabeelle ayaa sheegay in wariyaha la xiray war been
abuur ah ka faafiyay maamulka kaasoo ah in madaxweynaha maamul gobolleedka Hirshabeelle uu qaadacay ka qeybgalka shirka
London.
‘’Waa been abuur madaxweynaha waxaa uu ka qeybgalayaa shirka
London, meel uu ku sheegay malaha in uu shirkaa ka ka qeybgali doonin’’ ayuu
yiri wasiirka warfaafinta.
Madaxweynaha maamulka Hirshabeelle oo maalintii shalay dib
ugu laabtay magaalada Jowhar ayaa sheegay in ay ka soo horjeedaan Qorshaha
hormarinta Qaran ee la filayo in lala tago shirka London, isaga oo arintaa ku
micneeyay in qorshahan uu ka horeeyay dhismihii maamulka Hirshabeelle.
Horay maamulka Hirshabeelle ayaa saacado koooban xabsiga
dhigay Wariye Xusseen Xassan Dhaqane oo ah wariyaha Idaacada VOAda ee gobollada
dhexe oo lagu eedeeyay in uu warbaahinta ka sii daayay warar aan sax aheyn.
Ilaa iyo hadda ma jiro wax war ah oo ka soo baxay maamulka Taleefishinka
Universal ee ku saabsan xariga Ismaaciil Cabdulle Sabriye oo ugaga soo warama
magaalada Jowhar.
C/raxmaan Diini, Hiiraan Online
[email protected]