Maxkamada ciidamada oo u digtay mas’uuliyiinta dowladda iyo ilaaladooda
Jimco, May, 05,
2017 (HOL) – Maxkamada ciidamada qalabka sida ayaa uga digtay mas’uuliyiinta
dowladda federaalka Soomaaliya iyo ilaaladooda intaba in ay handadaan dadka
shacab ah.
Guddoomiyaha maxkamada darjada koowaad ciidamada qalabka sida G/sare Xassan
Cali Shuute ayaa sheegay in dilkii loo
geystay habeennimadii Arbacadii aynu soo dhaafnay loo soo xiray saddex askari
oo ilaalo ahaa sida uu sheegay hanta dhowrka guud ee Qaranka Dr Nuur Cali
Faarax.
‘’Saddex askari ayaa u xiran falka dilka ah baaritaan ayaa socda si loo
ogaato cidda rasmiga ah riday xabadda uu wasiirka ku dhintay’’ ayuu yiri
guddoomiyaha maxkamada darajada koowaad ee ciidamada qalabka sida.
Waxaa uu sheegay in inta badan ilaalada mas’uuliyiinta dowladda handadaa u
geystaan gadiidka ay wataan dadka shacabka marka ay jidadka marayaan, isaga oo
intaa ku darray in mas’uulkii lagu helo arintaa fal danbiyeedka dhaca wax ku
yeelan doono.
‘’Jidadka marka ay marayaan mas’uuliyiinta dowladda waxaa dhacda in ilaalada
ay handadaan ama qoryaha ku taagaan gadiidka ay leeyihiin dadka shacabka ah,
mas’uulkii arintaa ka ogolaada ilaaladiisa danbiga ayuu wax ku yeelanayaa’’ ayuu hadalkiisa sii raaciyay.
Digniinta ka soo baxday maxkamada ciidamada ayaa imaneysa xili marar badan
hore ilaalada mas’uuliyiinta dowladda iyo saraakiisha ciidamada lagu eedeeyay
in ay toogasho bareer ah u geystaan dadka shacabka ah xiliyada ay marayaan jidadka
caasimada.
C/raxmaan Diini, Hiiraan Online
[email protected]