Hanti Dhowrka guud ee Qaranka oo ku gacan seyray xil ka qaadistii lagu sameeyay
Jimco, May, 05, 2017 (HOL) - Hanti Dhowrka guud ee Qaranka Dr Nuur Faarax Jimcaale oo ayaa ku gacan
seyray xil ka qaadis ay xalay ku sameeyeen xubnaha gollaha wasiirada xukuumada
Soomaaliya, kaddib dilkii habeenimadii Arbacada loo geystay wasiirkii howlaha
guud ee DF Cabbas Cabdullaahi Siraaji.
Xeer ilaaliyaha ayaa sheegay in xil ka qaadistaasi aheyn mid
sharciga waafaqsan, islamarkaana gollaha wasiirada xaq u
laheyn in ay xilka ka qaadaan.
‘’Arintaasi sharci ma’aha, anniga xilka sifo sharci ah ayaan ku qabtay, gollaha wasiirada soo
jeedin ayeey leeyihiin waa in baarlamaanka cod aqbaliyad ah ku aqbalo soo jeedinta gollaha
wasiirada kaddibna madaxweynaha uu Dikareeto ku soo saaro xil ka qaadisteyda
ayuu yiri’’ xeer ilaaliyaha guud ee
Qaranka Dr Nuur Faarax.
Waxaa uu meesha saaray in xil ka qaadistan xiriir la
leedahay dilkii wasiirka hasse ahaatee waxaa uu shegay in ay jiraan sida uu
hadalka u dhigay arimo kale oo is biirsaday taasoo keentay in ra’iisal
wasaaraha iyo xeer ilaaliyaha Qaranka isku kaashadaan in tallaabadan la qaado.
‘’Uma arko in arintan xiriir la leedahay dilka wasiirka oo
kaliya, waxaa jiray qoraalo marar badan oo hore aan qoray oo aan ra’iisal
wasaaraha uga digayo in uu faragalinta ka daayo hanaanka maaliyada, sidoo kale
waxaa jiray qaladaad uu ku kacay wasiirka warfaafinta oo si aan sharci aheyn
labo mas’uul oo wasaarada warfaafinta ka tirsan xilka uga qaaday iyo xeer
ilaaliyaha guud oo warqad inta uu soo saaray leh waa in la soo xiraa labada mas’uul
ee xil ka qaadista lagu sameeyay, arimahaas oo dhan ayaa sheegay in aysan sharci aheyn waana
tan keentay in xil ka qaadisteyda loogu marmarsiyoodo dilka wasiirka ayuu yiri’’
Dr Nuur Faarax.
Dr Nuur Faarax Jimcaale ayaa sheegay in falka ay ku kaceen
ilaaladiisa xilka looga qaadi karin madaama ayuu yiri fal danbiyeedku yahay
mid ku kooban cida geysatay.
‘’Kama soo horjeedo in ilaaladeyda falkan dilka ku kaceen oo
anniga ayaanba laamaha amniga u gacan galiyay, mana aha arin aan xilka ku weyn
karo, waayo fal danbiyeedku waxaa uu quseeyaa cida geystay ayuu hadalkiisa sii
raaciyay.
Mar wax laga weydiiyay tallaabada xigta ee la qaadayo mar
haddii ay gollaha wasiirada sheegeen in xilka laga qaaday waxaa uu yiri’’ dastuurka ayaa na kala saaraya cidna sharciga kama
weyna.
Si kastaba dilka wasiirkii howlaha guud ee xukuumada Soomaaliya Cabbaas Siraaji ayaa u muuqda mid xiisad siyaasadeed ka
dhax abuuraya laamaha dowladda federaalka Soomaaliya kaddib xil ka qaadistan ay sameeyeen gollaha
wasiirada habeennimadii xalay.
C/raxmaan Diini, Hiiraan Online
[email protected]