Munaasabada 15 May oo laga xusay magaalada Beledweyne [Sawirro]
Isniin,
May, 15, 2017 (HOL) - Munaasabada 15 May
oo ku beegan maalinta dhalinyarrada Soomaaliyeed iyo aas-aaskii ururka SYL
sanadkii 1943kii ayaa maanta laga xusay magaalada Beledweyne ee xarunta gobolka
Hiiiraan.
Munaasabada
oo aheyd mid siweyn loo soo agaasimaya waxaa ka qeyb-gallay mas’uuliyiin ka
tirsan maamulka gobolka, wasiirka wasaarrada dhalinyarrada maamulka
Hirshabeelle, ururada haweenka iyo dhalinyarrada.
Sidoo
kale waxaa munaasabada heeso kala duwan ka qaaday Fanaanka Soomaaliyeed Dayax
Dalnuurshe oo lagu martiqaaday ka qeyb-gallay munaasabadan, isaga oo sheegay in
ay tahay markii ugu horeysay oo booqasho uu ku tago gobol ka mid ah gobollada
dalka Soomaaliya, waxaana uu intaa ku darray in uu ku faraxsan yahay
imaashiyihiisa magaalada Beledweyne.
Guddoomiyaha
ururka dhalinyarrada gobolka Hiiraan Maxamed Cabdullaahi Buraalle oo khudbad
dhinacyo badan taabaneysa ka jeediyay munaasabada ayaa ku dheeraaday muhiimada
maanta oo kale u leedahay dhalinyarrada Soomaaliyeed, isaga oo sheegay in 13kii
dhalinyarrada SYL ahaayeen sida uu hadalka u dhigay geesiyaal Soomaaliyeed oo
sabab u ahaa xornimada aynu maanta harsaneyno.
Guddoomiyaha
haweenka gobolka Hiiraan Farxaan Cumar Carte oo hadal kooban ka jeedisay xuska
munaasabada 15ka May ayaa hambalyo u dirtay guud ahaanba dhalinyarrada
Soomaaliyeed, gaar ahaan dhalinyarrada gobolka Hiiraan.
Wasiirka
dhalinyarrada iyo cayaaraha maamulka Hirshabeelle CabdiQani Jeenyo ayaa sidoo
kale hambalyo u dirray dhamaanba dhalinyarrada ku dhaqan deegaannada uu ka
arimiyo maamulka Hirshabeelle, isaga oo kula dardaarmay dhalinyarrada in ka faa’ideystaan
fursadaha kala duwan ee hor yeella.
Ma’aha
magaalada Beledweyne oo kaliya ee sidoo kale degmooyinka gobolka Hiiraan ayaa
lagu soo waramayaa in ay ka dhacayaan munaasabado kala duwan oo loogu
dabaal-dagayo 15ka May maalinta dhalinyarrada Soomaaliyeed.
C/raxmaan Diini, Hiiraan Online
[email protected]