Eedeyn loo jeediyay ciidamada Itoobiya ee ka howlgala gobolka Hiiraan
Axad, May, 14, 2017 (HOL) - Xildhibaanno ka tirsan baarlamaanka maamulka
Hirshabeelle ayaa ku eedeeyay ciidamada Itoobiya ay ka howlgala gobolka Hiiraan
in ay dileen dadka xoolo dhaqato u badan oo aan waxba galabsan.
Xildhibaan C/raxmaan Maxamed Guure oo ka mid ah mudanayaasha baarlamaanka
dowlad gobolleedka Hirshabeelle ayaa ku eedeeyay ciidamada Itoobiya in ay dadka
rayid ah oo u badnaa dad xoolo dhaqato ah ku dileen inta u dhaxeysa magaalada
Beledweyne iyo deegaanka Halgan ee gobolka Hiiraan.
“Ilaa iyo hadda ma heyno tira koob sax ah oo ku aadan dadka la dilay, hasse
ahaatee wararka na soo gaaraya ayaa sheegaya ciidamada howlgalo ay ka sameeyeen
inta u dhaxeysa magaalada Beledweyne iyo deegaanka Halgan ku dileen dad
rayid ah oo xoolo dhaqato u badnaa’’ ayuu yiri xildhibaanka.
Deegaannada ay dilalkan ka dhaceen ayuu ku sheegay Beerxaano. Nuur Fanax,
Garasiyaan iyo deegaanno kale oo ay ciidamada howlgal ka sameeyeen.
Maalin ka hor ayeey aheyd markii ciidamada Itoobiya ay toogasho ku dileen
Wiil iyo Aabihii kaddib qarax miino oo lagula eegtay deegaanka Beerxaanno.
Eedeynta loo jeediyay ciidamada Itoobiya ee ka howlgala gobolka Hiiraan ayaa
qeyb ka ah eedeymo inta badan loo jeediyo ciidamada howlgalka midowga Africa
AMISOM ee la xiriira dilka dadka rayidka ah mudada ay ku guda jiraan howlgalada
ka dhanka ah Al-shabaab.
Hiiraan Online, News Desk
