Salaadiin iyo Waxgarad magaalada Laascaanood u yimid xalinta colaada labo beellood
Sabti, May, 13. 2017 (HOL) - Madax-dhaqameed, cuqaal
iyo waxgarad ayaa lagu soo dhaweeyey magaalada Laascaanood xarunta Gobolka
Sool, si ay qayb uga noqdaan dhexdhexaadin laba beelood oo mudodheer colaad
sokeeye ku dhex martay koonfurta Gobolka Sool.
Madax-dhaqameedkan oo ay ka mid
ahaayeen Suldaan C/laahi C/raxmaan Good oo Hargeysa ka yimi, Suldaan Maxamuud
Guuleed Mirre, Suldaan Siciid Yuusuf Ducaale iyo Suldaan Yuusuf Cabdi Cawad oo
Gobolka Togdheer ka soo jeeda, waxaana weheliyey cuqaal iyo waxgarad kala duwan.
Weftigan oo lagu soo dhoweeyey
afaafka waqooyi ee Laascaanood ayaa waxa halkaasi ka hadlay Sheekh Dr. Axmed
Jaamac Ismaaciil Mire oo sheegay in ay hawl adag ku jireen isla markaana ay aad
u soo dhoweynayaan weftigan si ay qayb uga noqdaan maslaxada beelaha wallaalaha
ah ee colaadu dhexmartay.
Waxaa iyaguna halkaasi ka hadlay
Suldaan Siciid Cismaan Cali, Garaad C/laahi Maxamed Guuleed iyo Suladaan
Mustafe Maxamuud Aw Seed oo halkaasi ka soo jeediyey sida ay baahi ugu qabeen
hawsha adag ee ay gacanta ku hayeen, iyo baahida loo qabey cidkasta oo waxka
tari karta walaalaynta labada beelood.
Madax dhaqameedkan ayaa iyaguna si
wadajira u sheegay in joogi waayeen iyadoo dhibaato soo noqnoqotay, ayna u
muuqatay inay talo iyo waxtarba ku kordhin karaan.
Maaha markii ugu horeysey ee hawsha
labada beelood iyadoo dhamaadkii qarnigii tegey salaadiin iyo waxgarad kala
duwan ay ku soo afjareen tuulada Dharkayn-Geenyo, waxaanay markale burburtay
2013kii, waxaana la isku deyey in hawshaasi la xakameeyo inka badan 10 jeer
balse lagu guuldaraystay, waxase dadku rajo ka qabaan in haatan labada dhinacba
ay xiligan dareemeen xanuunka colaada iyadoo sanadkan bilawgiisii iyo
dhamaadkii kii tegey boqol ruux tiro ku dhow ay ku nafwaayeen boqolaala ay
dhaawacmeen halka kumanaan qoysna barakeceen.
Seynab Cabdi Warsame
[email protected]
Laascaanood G. Sool