Roobab ka da'ay deegaanno ka tirsan gobolka Sool
Sabti, May, 13, 2017 (HOL) - Robabkan
oo ka da'ay dhul aad u balaadhan oo ka mid ah gobolka Sool iyo degaanka Caymeed
ee Buuhoodle, waxaana la xaqiijinayaa in uu yahay roobkii ugu balaarnaa ee 5tii
sano ee ugu danbeeyey saameeyey dhul baaxadaas leh.
Magaalada Laascaanood ayaa ku
dhowaad 8 saacdood uu roobku ka da'ayey, iyadoo ay togaga biya mareenka ah ay
ilaa hada soconayaan.
Magaalada gudaheeda waxaa weli
matooro lagaga saarayaa gotaano biyo fadhiisin noqda kuwaas oo u badan suuqa
ganacsiga, waxaana dadku ku eedaynayaan Dawlada Hoose in dayacday banaynta
Biyo-mareenada magaalada, waxaanay xuseen hadii roobku sii socon lahaa mudo
intaas ka dheer in guryo badan ay dumi lahaayeen.
Meelaha abaarta darani ka taagnayd
ee roobsaday waxaa ka mid ah Degmada Taleex oo inteeda badan dooxooyinka
waaweyn ee daaqsinta ku wacan ay doogsadeen sida uu HOL u sheegay Xuseen Cabdi
oo aan Teleefanka kula xidhiidhnay.
"Xalin oo ahayd halka ugu daran
ee ay dhibaatooyinka caafimaad darona ka jireen ayaa roobsatay, sidookale
Dooxada Dhumay, Qawlo, Maragmaal iyo qaarkale ayaa si wacan lay sheegay inay u
doogsadeen walow meelo roobku ku yaraa ay jireen oo magaalada Taleex ay ka mid
tahay waa la doogsadey.
Degmada Xuddun ayaa sidoo kale
magaaladu aanay helin roob balse waxa uu Axmed Cali Faarax oo ah Suxufi
halkaasi ku sugan in meelkasta oo magaalada looga baxo rooban tahay marka laga
reebo meelo dhawra oo aanu ka fogayn.
Dhinaca kale dhulka kaymaleyda
Hawdka ee Koonfurta gobolka Sool iyo degaanka Buuhoodle ee Hawdka loo yaqaan
ayaa marlabaad doogsadey iyagoo dadka degaankaas ku nooli ay ahaayeen kuwo doog
iyo xareedba haysta/
Si kastaba ha ahaatee walaac aad u
daran oo haystay dadka ku nool dhulka loo yaqaan Dooxada Nugaaleed ayaa maanta
xareed dabaalaya iyagoo ay ka khafiiftay cabsidii darayd waqti ay soo dhowaatey
dabaysha qalalan ee Xagaaga.
Seynab Cabdi Warsame
[email protected]
Laascaanood G. Sool
