Ciidamada Itoobiya oo Wiil iyo Aabihii ku dilay deegaanka Beerxaano ee gobolka Hiiraan
Jicmo, May, 12, 2017 (HOL) – Wararka naga soo gaaraya deegaanka Beerxaano ee gobolka Hiiraan ayaa sheegaya in
ciidamada Itoobiya subaxnimadii hore ee maanta toogasho ku dileen Wiil iyo
Aabihii oo ka tirsanaa dadka deegaanka.
Qof ku sugan deegaanka Beerxaano oo la hadlay HOL ayaa sheegay in Axmed
Xaanshi Tuuroow iyo wiilkiisa oo lagu magacaabo Shinade Axmed Xaanshi,
ciidamada Itoobiya dileen.
Dilka ayaa ka danbeeyay qarax miino oo ciidamada lagula eegtay meel
dulleedka koonfuureed uga beegan deegaanka Beerxaano, lamana oga khasaaraha
ciidamada Itoobiya ka soo gaaray qaraxa.
Ma jiro ilaa iyo hadda wax war ah oo ka soo baxay maamulka gobolka Hiiraan
oo la xiriira dilka labada ruux ee rayidka ah.
Sidoo kale ciidamada Itoobiya ayaa maalintii shalay kula dagaalamay inta u
dhaxeysa deegaanka Garasiyaani iyo Halgan ee gobolka Hiiraan xoogagg ka tirsan
Al-shabaab.
Ra’iisal wasaaraha dalka Itoobiya Hailemariam
Desalegn ayaa maalintii shalay kulankii caalamiga ahaa ee London ka dhax
sheegay in ciidamada Itoobiya howlgal ka wadaan qeybo ka mid ah gobolka
Hiiraan.
Hiiraan Online, News Desk
