Qaramada Madoobey oo kordhineysa taageerada ay siiso Soomaaliya
Jicmo, May, 12, 2017 (HOL) - Xoghayaha
guud ee Qaramada Madoobey Antoni Gutters ayaa sheegay hadda Soomaaliya in
ay hadda ku sugan tahay sida uu hadalka u dhigay xaalad khatar iyo
wanaagba isugu jirta.
Waxaa uu sheegay Soomaaliya in ay kordhisay tayadeeda maamul, waxyaabaha
aas-aaska u ah xasillooni dheeraad ahna la diyaariyay, laakiin dhammaan
guulahan ay gaareen madaxweynaha iyo dowladda wali yihiin kuwo nugul oo aan
adkeyn.
Xoghayaha ayaa sheegay Soomaaliya in ay u baahan tahay maalgashiyo lagu
badbaadiyo horumarka la sameeyay islamarkaasna deg deg wax looga qabto
xaaladda cunno la’aanta ah ee sii kordheysa ee saamaynaysa malaayiin dad
Soomaaliyeed ah.
“Noloshooda waxaa burburiyay dhibaatooyin halis ah oo is biirsaday oo isugu
jira abaar daba-dheeraatay, saboolnimo baahsan iyo u-nuglaan, waxaana ula sii
jirta barakac iyo xasillooni-darrida dalka ka jirta iyo weliba xadgudubyo lagu
sameeyo sharciga caalamiga ah ee xilliyada dagaalka iyo sharciga xuquuqul
insaanka kuwaas oo la socda weerarrada argagixiso ee dhammaanteen aan ka wada
warqabno” ayuu yiri Antonio.
Ugu dambeyntii Xoghayaha Guud ee QM ayaa sheegay hay’adaha Qaramada Midoobay
iyo saaxiibada taageera in ay sare u qaadeen oo ay kordhiyeen caawimaadda
dhowrkii bilood ee la soo dhaafay, isaga oo sheegay in ay kaalmo gaarsiiyeen
dad ku dhow 2 milyan oo ka mid ah 5.5 milyan oo qof oo la qorsheeyay in la
gaarsiiyo cunto, lacag caddaan ah, daweyn nafaqo, adeeg caafimaad, biyo nadiif
ah iyo adeegyo lagu badbaadinaayo.
C/raxmaan Diini, Hiiraan Online
[email protected]