Ra’iisal wasaaraha Itoobiya oo shirka London ka dhax sheegay howlgal ka socda gobolka Hiiraan
Khamiis, May, 11, 2017 (HOL) - Ra’iisal
wasaaraha Itoobiya Hailemariam Desalegn ayaa shirka London ka dhax sheegay in
Soomaaliya u baahan tahay sida uu hadalka u dhigay in laga caawiyo dhinacyada,
dhaqaalaha, hormarka, ciidamada iyo siddii shaqo abuur loo sameyn lahaa.
Mar uu ka hadlayay dhinaca howlgalka ciidamada midowga Africa ee AMISOM gaar
ahaan kuwa ka socda dalka Itoobiya ayuu sheegay in waqtigan ciidamada Itoobiya
kula dagaalamayaan gobolka Hiiraan xoogagga Al-shabaab.
‘’Xiligan ciidamada Itoobiya iyo kuwa Soomaaliya oo isku dhinac ah ayaa
howlgal ka wada deegaanka Halgan ee gobolka Hiiraan oo ay kula dagaalamayaan
Al-shabaab’’ ayuu yiri ra’iisal wasaare Desalegn.
Waxaa uu sheegay ra’iisal wasaaraha in dhiigooda u daadinayaan sidii ay
Soomaaliya u gaari laheyd hormar, waan tan keentay ayuu yiri in xiligan ciidamada
Itoobiya oo kaashanaya kuwa Soomaaliya howlgal ka sameeyaan gobolka Hiiraan
gaar ahaan deegaanka Halgan.
Ra’iisal wasaaraha ayaa wada jir uga codsaday dowladda dhexe iyo kuwa maamul
gobolleedyada in la hergaliyo qorshayaasha iyo dhamaanba heshiisyada lagu gaaro
shirka London.
Ciidamada Itoobiya ayaa saldhig ballaaran ku leh gobolka Hiiraan, sidoo
kalana waxaa ay howlgalo ka dhan ah Al-shabaab ka fuliyaan deegaanno ka tirsan
gobolka, iyaga oo dhawaan la wareegay
gacan ku heynta deegaanka Halgan.
C/raxmaan Diini, Hiiraan Online
[email protected]