Jimco, Maarso ,03 , 2017 (HOL) – Dad
reer Somaliland ayaa shalay mudaharaad la hor tagay safaaradda Imaaraadka
Carabta ku leedahay magaaladda London, waxaanay sheegay inay muujiyeen sida
aanay ogolaan doonin saldhiga Militari
ee magaaladda Berbera uu ka samaysanayo.
Dadkii soo abaabulay
mudaharaadkan ayaa boodhadhkooda ku muujiyey sida uga soo horjeedaan saldhiga
Militari ee Berbera uu ka samaysanayo wadanka Imaaraadka Carabta, waxaanay hal
ku dheg ku qoreen boodhadhka sitaan,isla markaana ku dhawaaqayeen erayo ay ku
muujinayaan sida aanay raali uga ahayn
Saldhigaasi Militari, waxaanay lahaayeen “ma doonayno saldhig militari,
Somaliland uma baahna saldhiga Militari ee caawimo bani’aadanimo iyo horumar
bay u baahan tahay.”
Dadweynaha iskugu yimid
safaaradda Imaaraadka Carabta ayaa sheegay inay safaaradana u gudbiyeen qoraalo
ay ku muujiyaan in aanay doonayn in Somaliland noqoto goob dagaal iyo goob
militari.
Gudoomiyaah xisbiga Mucaaradka ah
ee WADDANI, ahna gudoomiyaha golaha Wakiilada Somaliland C/raxmaan Maxamed
C/laahi Cirro ayaa taageeray saldhigaasi,isla markaana sheegay in aanay
Somaliland dani ugu jirin saldhig militari.
“Somaliland waxa ay u baahan
tahay horumarin, waxa ay u baahan tahay xasilooni ee uma baahna saldhig iyo
ciidan shisheeye toona, waxa ay u baahan tahay in ay nabad kula noolaato
dalalka ay deriska la tahay. Xisbiga WADDANI na waxa uu meel cad iska taagay
arrinta Saldhiga , weli na waa uu ka taagan yahay, Saldhig ma ogolin, dadku na
xaq bay u lee yihiin in ay ka hadlaan oo ay ra’yigooda ka dhiibtaan saldhiga
haddii ay Somaliland joogaan iyo weli ba haddii ay yihiin dadka reer Somaliland
ee dibadda ku nool ba. “ayuu yidhi Cirro .
Haseyeeshee, xisbiga wadani iyo
xukuumaduba waxay xisbiga Waddani ku eedeeyeen inuu xisbigaasi ka hor yimid
sharciga wadanka u yaala, isla markaana go’aankii baarlamaanku meel mariyeen ee
ogolaanshiyaha saldhigaasi ka hor yimaadeen, taas oo ay ku macneeyeen dastuur
jabin inay tahay.
“ninka gudoomiyaha ka ah sharciga
ee 12-ka sanadood gudoomiyaha ka ahaa Wakiiladda, ee lagu maamuusayo xilkaasi
uu Somaliland u hayo, waxaanu leenahay qodob dastuuriya ayuu jabinayaa waa inay
shacabka Somaliland ka war hayaan, oo ay tidhaahda ka noqo isaga iyo
saaxiibadii (Mudahaaradadda)”ayuu yidhi Cadaani wasiirka warfaafinta
Somaliland.
Barkhad-ladiif M. Cumar, Hiiraan
Online
[email protected]
Hargeysa, Somaliland