Ra’iisal wasaare Kheyre oo ka hadlay sifaha uu ku soo xushay gollihiisa wasiirada
Talaado,
Maarso ,21 , 2017 (HOL) – Ra’iisal wasaaraha xukuumada Soomaaliya Xassan Cali
Kheyre oo magacaabistii gollaha wasiirada kaddib munaasabada khudbad ka
jeediyay ayaa soo bandhigay sifaha iyo sharuudaha uu ku soo xushay gollaha
wasiirada cusub.
Ra’iisal
wasaaraha ayaa sheegay in gollaha wasiirada laga eegay dhinaca da’da, aqoonta,
qibrada shaqo iyo uusan wax danbi ah ka galin dalka, islamarkaana xiriir la
laheyn ururada argagixisada.
Waxaa
uu sheegay ra’iisal wasaare Kheyre in wasiir kasta looga baahan yahay in uu
cadeeyo ka go’naashaha in uu diyaar u yahay dowlad wanaag, isla xisaabtan, daah furnaan iyo in lala
dagaalamo musuq maasuqa.
‘’Iyadoo
laga soo bilaabayo madaxweynaha, ra’iisal wasaaraha ilaa wasiirka waa in uu
cadeeyaa mas'uul kasta hantidiisa guurtada ah iyo tan ma-guurtada ah
kaddib marka loo magacaabo xilka si loo ogaado maanta xoolaha aan leenahay iyo
mustaqbalka marka aan xilka ka degno’’ ayuu yiri ra’iisal wasaaraha.
Hadalka
ra’iisal wasaaraha ayaa imanaya xil maanta uu ku dhawaaqay xukuumad ka
kooban 27 wasiir, 26 wasiir ku-xigeen iyo 15 wasiiro-dowle taasoo guud ahaan
marka leysku daro wadarta gollaha wasiirada la magacaabay ka dhigeysa 68
wasiir.
Gollahan,
wasiirada ayaa la filayaa in la horgeeyo baarlamaanka Soomaaliya si ay u
hellaan codka kalsoonida.
C/raxmaan Diini, Hiiraan Online
[email protected]
