Qof u dhintay maandooriye uu cabay magaalada Burco ee gobolka Togdheer
Talaado, Maarso ,21 , 2017 (HOL) – Hal
qof oo u geeriyooday mid kalana waa uu dhaawacmay kadib markii ay cabeen walxo
laga sameeyey maandooriyeyaal macmal ah magaaladda
Burco ee gobolka Togdheer .
Taliyaha qaybta booliska gobolka
Togdheer Cabdi Muuse Cabdilaahi ayaa warbahinta u xaqiijiyey inay hal qof u
geeriyooday mid kalena dhaawac yahay ka dib markii ay cabeen walxo la isku daray
oo laga sameeyey Khamri taas oo sababtay dhimashadda iyo dhaawaca.
“Dadkii cabi jiray khamriga markii khamrigii ay waayeen
ayey isku dayeen inay qastaan ama
samasytaan bahalo la isku dardaro oo ay khamri ka dhigtaan, ka dibna ay cabeen
midna wuu geeriooday mid kalena wuxuu yaallaa dhakharka, ciidankuna baadhistii
bay gacanta ku hayaan, ninkii lagu eedeeyey inuu waxan sameeyey gacanta ayaanu
ku haynaa”ayuu yidhi Cabdi Muuse taliyaha qaybta booliska gobolka Togdheer.
Waxaanu intaasa ku daray “Dadka waxaan uga digayn waxa inagu
soo kordhay ee dhimashadeedi ugu horeysay inay ka waantoobaan oo iska
ilaaliyaan wixii aan caafimaadka wax u yeelaysa, iyadoo markii horaba xaaraan
iyo caafimaad daraba ahaa”.
Dadkan ku sumoobay maandooriyeyaal macmal ama samays ah oo
ay ka dhiganayeen khamri ayaa labaddii qof ee ugu horeeyey ee waxyeelo ka soo
gaadho ay ka dhacday magaaladda Burco, taas oo ciidankuna sheegeen inay ku daba
jiraan dadka samaynayey ee iibinaya maandooriyeyaashan samayska ah.
Barkhad-ladiif M. Cumar, Hiiraan
Online
[email protected]
Hargeysa, Somaliland
