Hargeysa: Laba Nin oo neef bakhtiyey doonayey inay dadka ka iibiyaan oo la qabtay
Talaado, Maarso ,21, 2017 (HOL)- Magaaladda Hargeysa ayaa lagu qabtay laba nin oo neef bakhti ah intay
qaleen doonaya inay magaaladda ka iibiyaan.
Labadan nin ayaa dooxa weyn ee
magaaladda Hargeysa neef Lo’ah oo bakhtiyey lagu qabtay iyagoo haragii ama
saantii ka saaraya,isla markaana doonaya
inay magaalada ka iibiyaan sidaasna waxa warbaahinta u xaqiijiyey agaasimaha
waaxda arrimaha bulshadda ee dawladda hoose ee Hargeysa KHadar Yuusuf.
“waxa dooxa weyn ee magaaladda Hargeysa
ay laba nin haraga (Saanta) kaga saarayeen neef Lo’ ah oo bakhtiyey oo ay
doonayeen inay dadka ka iibiyaan, waxaanay meesha haragga kaga saarayeen ahayd
meel gudaafad ah markiiba waana la noo soo sheegay waana qabanay labaddii nin
sharcigaana hor gaynaynaa”ayuu yidhi agaasimaha arrimaha bulshadda ee dawladda
hoose ee Hargeysa Khadar Yuusuf.
Agaasimuhu waxa kale oo uu sheegay in
sidoo kale maalmo ka hor duleedka koonfureed ee magaaladda Hargeysa ay ku
arkeen hilib badan oo lagu daadiyey oo ay u maleeyeen inuu ahaa hilib Kalluun,
ka dibna ay gubeen, haseyeeshee ay hadda baadhayaan wixii meesha banaan ku soo
qubay.
Dhinaca kale, waxa ay sheegeen dawladda
hoose ee Hargeysa in cuntooyin badan iyo Dawooyin badan ay bilihii u dambeeyey
ka soo gureen bakhaaradda iyo tumaamadda magaaladda, kuwaas oo dhacay, waxaanay
sheegeen in ololahaasi lagu baadhayo waxa dhacya uu socon doono,isla markaana
aanay ka ogolaan doonin in dadka laga iibiyo cuntooyin iyo dawooyin dhacay.
Barkhad-ladiif M. Cumar,
Hiiraan Online
[email protected]
Hargeysa, Somaliland.
