Kenya “57 Shabaab ah ayaan dilnay
Khaamiis, Marso, 02, 2017 (HOL) – Dowladda Kenya ayaa waxa ay ka hadashay dagaalka
ciidamadooda oo garab ka helaya ciidamo Mareykan ah iyo dagaalyahano ka tirsan
Al-shabaab kula galeen duleedka degmada Afmadow ee gobolka Jubadda hoose.
Afhayeenka ciidamada difaaca Kenya Joseph Owuoth ayaa warbaahinta Kenya
waxaa uu u sheegay dagaal ciidamadooda maanta ay la galeen ururka Al-shabaab in
ay ku dileen 57 dagaalyahan oo ka tirsan Al-shabaab.
Waxaa uu sheegay afhayeenka weerar cir iyo dhul ah oo saakay
08:45 daqiiqo ah ku qaadeen goob ay ku sugnaayeen dagaalyahano ka tirsan
Al-shabaab, taasina ay sababtay in khasaaraha la gaarsiiyay Al-shabaab uu noqdo
mid badan.
“Waxaan dilnay 57 ilaa 55 Askari oo ka tirsan Al-shabaab, weerarku waxa uu ahaa
mid xoogan, maadaama Ciidamo is garab sanayay ay qaadeen, ciidamadeena
feejignaan dheeri ah ayay muujiyeen” ayuu yiri Joseph Owuoth.
Sidoo kale Afhayeenka Ciidamada difaaca Kenya Joseph Owuoth ayaa
sheegay ciidamadooda khasaaraha soo gaaray in uu yahay mid kooban, oo tiro yar
ah, maadaama ciidamada ay ahaayeen kuwo dagaalka diyaar u ahaa, waxaa uu tilmaamay in ay sii wadi doonaan dagaalka Al-shabaab, ilaa gobolka uu ammaan
ka noqdo.
Maamulka Jubbaland iyo Al-shabaab wali kama aysan hadlin dagaalka ka dhacay duleedka
Degmada Afmadow ee gobolka Jubbada hoose, kaasi oo ka dhashay khasaare dhimasho
iyo dhaawac ah oo soo kala gaaray dhinacyadii dagaalamay.
C/raxmaan Diini, Hiiraan Online
[email protected]