Ra’iisal wasaaraha Soomaaliya oo dalbaday in 45 cisho dib loo dhigo doorashada madaxweynaha Galmudug
Axad, Maarso, 19, 2017 (HOL) –Ra’iisal wasaaraha Soomaaliya
ayaa markii ugu horeysay ka hadlay doorashada madaxweynaha maamulka Galmudug,
kadib kulamo is daba joog ah uu la yeeshay hogaanka maamulka, xildhibaannada
labada aqal iyo qeybo ka mid ah bulshada ka soo jeeda deegaannada Galmudug.
Ra’iisal wasaaraha ayaa kulamadiisa kadib soo saaray shan qodob oo la
xiriira arrimaha doorashada Galmudug iyo sida lagama maarmaanka u tahay in dib
loogu dhigo.
Ra’iisul Wasaaraha ayaa soo jeediyay qodobadan hoos ku xusan:-
1-ka dib markuu tixgeliyey duruufaha qalafsan ee ka dhashay xaaladda
abaaraha ee ka jirta deegaanka Galmudug oo hadda gurmadkeeda lagu gudo jiro iyo
baahida loo qabo maamul lagu wada qanacsanyahay.
2-Maadaama ay Dawladda Federaalka Soomaaliya ay ku gudo jirto dhameystirka
Golaha Fulinta ee xukuumadda taasoo aan looga maarmeyn fududaynta iyo ka qayb
qaadashada doorasahda Galmudug.
3-Raiisul wasaaraha Soomaaliya wuxuu soo jeedinayaa in Barlamaanka Galmudug
uu doorashada dib u dhigo muddo dhan 45 maalmood si loo yagleelo maamul dhaxal
gal ah oo hoggaankiisa heshiis laga wada yahay.
4-Murashaxiinta Jagada Madaxweynaha Galmudug waxaan ugu baaqayaa in ay nala
tixgeliyaan in la helo dib-u-heshiisiin iyo is afgrad, si loo qabto doorasho
xor iyo xalaal ah oo lagu doorto hogaan raali ka yihiin dhammaan shacabka
Galmudug.
5-Ugu danbeyntii waxan ugu baaqayaa shacabka Galmudug iyo hogaamiyeyaasha
Bulshada Galmudug in fursadan taariikhiga ah loo wada guntado, si iyadoo loo
dhan yahay loo dooran lahaa hoggaan u hordeeda bulshada nabad iyo horumar dhan
walba ah.
Ugu danbeyntii, tan iyo markii
Madaxweynihii hore ee Galmudug C/kariin Xuseen Guuleed is casilay bishii la soo
dhaafay, waxaa olole loogu jiray xilkaas, iyadoo Musharaxiin dhowr ah ay ku
dhawaaqeen inay u taagan yihiin xilkaas.
C/raxmaan Diini, Hiiraan Online
[email protected]